Beschryuinghe vande noort custe van Enghelant, gheleghen onder t'ghebiet vanden hertoghe van Noortfock, met de gheleghentheyt dies aengaende.
Eerst als Ees z.w. ten z. van v leyt, soo ismen by Noorden de banck van Castling: als Cochen west n.w. van v leyt, soo ismen by zuyden de banck: Als den toren van Leystaf by Zuyden de boom is, soo ismen aent Zuydt-eynt vande banck oft hollem van Leystaf: ende die op de Zuydt-rede van Leystaf setten wil, die sal de strant aen boort loopen op vier vadem, tot dat den toren West, ende West ten Noorden van v is, ende settent aldaer op vier vadem: Ist datmen wil voor de Brouwerye doort naeuwe, so salmen wat vande strant af wijcken, ende gaen alsdan Noordt ende Noort ten Westen aen, ende settet voor de Brouwerye op de Noordt-Ree op ses oft seuen vadem: Ende wiltmen door d'Holmen in Zee seylen, soo sedt de Moelen ende Brouwerye over een, ende loopende soo dweers door de bancken. Item om by de hauen van Jaermuyden door die bancken te loopen, soo sedt het dorp van Zuydthoen ouer t'Noorderste hooft, ende den grooten boom by Zuyden aen de platte Kerck, seylt dan recht door d'Holmen van Jaermuyden. Recht by Noorden d'hauen van Jaermuyden leyt een middel-plaet oft middelgront, aen de Westzyde van dien ist seuen vadem diep. Item recht voor by de stede van Jaermuyden leyt oock een middelplaet ghenoemt Cocklijn diemen Zeewaerts op neghen vadem door zeylen mach. Daer staet een plompen toren te landtwaerts by Noorden Jaermuyden, als den toren comt aen t'Zuydteynt vant Bosch, soo ismen by Noorden d'Holmer van Jaermuyden.
Item alsmen van by Noorden comt ende Winterduyn z.z.w. van v is, dan ismen by Zuyden Winterduynen banck, dan naer de strandt toe zeylende op dry oft vier vadem, tot dat ghy by z. Cocklijn sijt. Ontrent o. ende Oosten n. van Jaermuyden buyten de Holmen leyt een banck die maer dry oft vier iaren gheleghen heeft, ende is diep twee vadem, ende recht by Noorden en by Zuyden twintich vadem.
Item Blaeckeny is een tye hauen lancx de strant ingaende, daer tonnen int gadt ligghen: tusschen Wels ende Blaeckeny leyt een droochte, ghenaemt de Pol ende Peper, aent Westeyndt vande Peper gaet t'diep van Wels in, dat mede int gadt betont is. Vier mylen by w. Wels leyt Bornum al waert seer vlack water is, ende de droochten seer verre in Zee strecken. Het diep van Burmon gaet lancx de strant in, is aen de slinckerhant bebakent. Ende recht by w. leyt een diepte van dry vadem ghenaemt Burnoms put, anders ist wel dry mylen in Zee maer twee vadem diep. Ende alsmen nae t'diep van Lindt wilt zeylen, soo moetmen dicht by Capelle door zeylen, ende laten de Zonck t'Zeewert ligghen bouen t'water, ende gaen alsdan Zuydt ten Westen nae d'eerste ton int gadt van Lindt.
Dese Landen leueren wt Wol, Wollen Lakenen, sommighe Tarwe, Garste, Mout, Enghels-bier, Buckinck ende Sprot. Daer wort mede (besonder tot Lindt) veel ghesouten Visch, ende lynen Laken vervoert ende verhandelt.
Auteursrechtelijk beschermd
