Beschryvinghe vande custe van Schodtlandt, daer af t'Liedt (streckende tot Eedenborch) de vermaerste hauen is.
TEn eersten van Cogghen Eylant tot t'heylighe Eylandt n.n.w. vier mijlen. Daer by zuyden in d'inwijck goede rede is op dry oft vier vadem, teghen t'slodt daer is de beste rede. Tusschen t'westeynt vande Schasse ende t'heylige Eylandt, ligghen twee Clippen tegens malckanderen ouer, diemen de Ploech ende de Goudtsteen noemt. Men sedt Doestenburch ende Baenburch ouer een, ende zeylen soo tusschen beyden door. Van daer w.n.w. dry mijlen leyt Barwijck om daer inne te loopen, soo laetmen de Baeckens aen de rechter hant, ende zeylen tot binnen de stede van Barwijck. Van daer tot Abbenhooft noordt noort-west vijf mijlen. Van Abben-hooft tottet Eylandt Bass, w.n.w. vier mijlen. Item van Tuter eynt vande Schassen tot Abbenhooft n.w. ses mijlen. Van daer tottet Eylandt May n.w. ende n.w. ten n. vier mijlen. Van May tot Fijsnes n.o. ten o. een mijle. Van May weder ouer tot Bass, z.w. ende z.w. ten z. twee groote mijlen, Bass leyt een mijle vant west landt. Van Bass tottet brande Eylandt w. ende w. ten n. dry mijlen, men mach by zuyden om zeylen. Dry mylen by w. t'Brande Eylandt aent z. landt leyt de stadt van Eedenburch de vermaerste van Schotlandt.
Item aen de n. zijde van Fyssnes leyt den inwijck van S. Andries, daer goede rede is voor eenen westen windt. Van S. Andries dry mijlen noordtwaerts leyt de riuiere van Donday, streckende dweers wt de Zee in, ende men settet voor de stede. Ende innewaerts leyt een stedeken ghenaemt S. Jan. Item daer leyt een Clip ghenaemt t'Schaep, z.o. van Donday ontrent anderhalf mijle van landt. Twee mijlen noordtwaerts van Donday staet eenen hooghen toren op eenen hoeck van t'landt (ghenaemt Calliarbradt) twee mijlen daer by n. leyt de hauen van Maros, die aen beyde de Landen schoon is om in te comen, diemen midtswater in zeylen mach, ende wijcken dan noordtwaert op, ende settent daer voor die stede neder. Item by n. Maros dry mijlen leyt den wthoeck van Seynhooft, al waer een Slotken op staet. Twee mijlen noortwaerts is gheleghen de hauen van Abberdijn, al waer t'westlandt vuyl, ende t'oostlandt schoon is. Men moet dicht by het oostlandt in zeylen tot binnen de hauen, ende is diep in t'gat dry vadem, ende men macht binnen setten op vier oft vijf vadem voor die stede.
Wt dese voorsz. Landen brengtmen groue Schodtsche Lakenen, Frisetten, Smeedtscolen, weynich Garst ende Mout. Dit sijn die handelinghe van dese Hauenen.
Auteursrechtelijk beschermd
