Zee custen tusschen Wicht ende Doueren, ende de beschryuinghe van dien.
OMme de Naelde van Wicht inne te seylen, moetmen voor al weten dat aen de Westzijde veel Bancken liggen, ende men moet recht op de Naelde aen seylen, ende houden d'innehoeck vant Eylant recht buyten de Naelde, ende seylen alsoo binnen de Naelde; ende schouwen van t'Eylant een weynich, loopende tusschen de Cinghel ende den hoeck vant Eylandt in; wijckende alsdan Oostwaerts tegens Calfer-oort, op seuen oft acht vadem settende.
Omme d'Oosteynde van Wicht inne te seylen, houtmen t'Slodt ouer de Leemeuyl soo lange als t'Swane Cliff comt binnen den hoeck vant Eylant, soo brengtmen alsdan de Leemcuyl aent Oosteynde van Porsmouth: welck men alsoo staende sal houden, tot dattet Slodt by Westen Porsmouth staende, comt aen de Oostzijde vant bosch, so seyltment altemet op na t'Clooster van S. Helene. Dese mercken aldus staende machmen noch platen noch sanden beseylen: ende oft saecke waer datmen de Leemcuyl niet sien en mochte, soo houtmen t'Slot by Westen t'Swane-Clif, tot dat S. Helene Kerck een Schip lengte buyten den hoeck vant Eylandt comt, dan machmen vrylijck Noortwest aengaen sonder t'Riff te beseylen, dan houtmen den viercanten toren tusschen d'Oosteynde van Porsmouth ende t'Slodt, so lange t'Slodt by Westen Porsmouth comt aen de Oostzijde vant Bosch, ende seylen soo innewaerts.
De mercken vande Plaet sijn dese, te weten, daer staet een Slodt by Oosten Porsmouth ende eenen viercanten toren, daer recht hier voren af gheseyt is, als de Leemcuyl comt recht by Oosten t'Slodt datmen effen doorsien mach, soo ismen opt Plaetken diep mettet leechste water vijf vadem een half, ende alsdan staet het Slodt by Westen Porsmouth inde Westcant vant Bosch. Ende als den viercanten toren comt aen de Westzijde vant Slodt by Oosten Porsmouth, so staet het Slodt by Westen Porsmouth inde Westcant vant Bosch, daer heeftmen ses vadem mettet hooghe water, ende als den viercanten toren staet tusschen d'Oosteynde van Porsmouth, ende t'Slodt recht tusschen den Leemput ende den toren, ende 't Slodt by Westen Porsmouth aent Oosteynde vant Bosch, heeftmen mettet hooghe water elf vadem, ende den Leemput aen den toren van Porsmouth, ende dat Slodt int westeynde vant Bosch, soo heeftmen mettet hooghe water thien vadem: als sinte Helene Zuydtwest ten westen van v leyt, soo leytet Zuydtoost eynde vande Plate Noordoost ten Noorden van v.
Item dry mylen by oosten Weenbrugghe leyt Arundel, is een tye hauen diep twee vadem met haluer vloet, men seylt het by t'westlandt in, ende settent voort Dorp op vijf vadem. Van Arundel tot Tychester vier mijlen, daer is een Cingel aen de oostzijde daermen by lancx in seylen mach, tis diep int gadt ter haluer vloet dry vadem, midden voor de hauen ligghen Clippen onder t'water: Ende is van by Westen inne te comen breedt ende wijdt, ende met de halue vloet diep twee vadem, binnen ist oock wijt ende breet, men settet op vier oft vijf vadem.
Om in de Camer te seylen salmen by de Cingel henen inne loopen, ende op een Cabels lengte comende aent eynde vande Cingel, salmen naer t'Slodt van Winckelzee op wijcken, latende alle Baeckens aen Stuyrboort, ende settent inde Riuiere van Rije op vier oft vijf vadem, want de Camer (daermen in plach te legghen) is nu gantsch verloopen.
Deze Landen en hebben gheen sonderlinghe neringhe, dan van Wolle ende Lakenen: midtsgaders van Branthout datmen van daer haelt.
Auteursrechtelijk beschermd
