Vant principael deel van Enghelandt, te weten de riuiere van Londen, met alle de bancken hem streckende tot Herwitz.
EEn Schip comende van by Westen, ende wel binnen Gyongh door zeylen na t'Voorlandt, sal eerst aengaen n.n.o. ende n. ten o. als dair de Moelen die opt Westeynde vant Voorlandt staet comt aen de Westzijde vande Valleye, zeylt dan n. ten o. soo langhe als den toren op t'selfde Voorlandt comt aen de Oostzijde vande valleye, soo ismen by Noorden de Querns, dan comt een cleyn torenken aen den hoeck van t'Voorlandt, ende het torenken (staende opt landt van Doueren) comt alsdan ouer de derde witte Duyn besijden t'slodt. Die van by Noorden binnen doorzeylen wil, die come de Querns niet nader dan op seuen vadem. Sedt den hoeck van Doueren z.z.w. van v, soo looptmen het beste diep in: Als den plompen toren comt in Ramsgadt, soo ismen beneffens de Querns: Als die Moelen comt int Ramsgadt oft valleye, soo ismen by Zuyden de Querns. Item als ghy legt in Duyns, ende d'innerhoeck vant Clif van v leyt z.z.w. soo legghen de Querns n. ten o. van v, ende t'Noorteynde van Coyngh n.o. ten n. ende n.o.
Die van Mariegadt op de Teems begheert te zeylen, sal by Noorden t'Voorlandt in loopen w.z.w. ende seylen dan beneffens t'landt West, ende West ten Noorden voor de Rocoluers, al waer een diepgaende Schip het tye verwachten moet, om ouer de Lassen te loopen tusschen een ton ende baecken door, daer niet meer dan dry vadem waters is: Vande ton tottet baecken aen de Noortzijde w.n.w. ende west ten noorden alwaer dry vadem diep is; ende recht voor by t'baecken ist maer twee vadem diep met half vloet. Van daer tot in Zeerack w.n.w. Ende kiest dan meest de Noortsijde om de Loere die vant Zuytlant affloopt, voortaen midtswater tot Grauesent. Omme by Noorden wederom inde Zee te zeylen, salmen den hoeck van Blacteyl schouwen voor den middelgront, ende zeylen dan n.o. ende n.o. ten n. ter tijt toe dat eenen scherpen toren int midden tusschen twee andere toornen staet, den grooten spitsen toren is ghenaemt S. Mattheus Abdye, zeylt op de voors. mercken door den spitsen tot op een halue Cabels lengte aen strant, ende alsdan by de strant lancx n.o. tot de Neus, al waer twee boomen staende opt hooch, aen malckanderen comende, seylt dan n.n.w. op de mercken van Herwitz, tot datmen voor de hauen comt: Alsdan nae Olferts-nes n.o. ten n. ende n.o. in Zee. Item alsmen teghen den spitsen comt, ende t'baecken opte Schoeu west zuydtwest van v leyt, soo gater een diep o.n.o. in Zee, welckmen der Coninghinnen diep noemt, ende daer is vier vadem mettet leeghe water.
Die in Herwitz begheert te zeylen, sette den plompen toren staende by westen Herwitz int Bosch by Zuyden Herwitz, ende zeylen n.w. ten n. in, ende n.n.w. tot binnen de staken oft vischerie, dan machmen Westwaerts oft Noortwaerts op wijcken waermen wil, ende settent op ses oft seuen vadem. Ontrent een half mijle van t'Noorteynde vant Root Cliff leytet sandt van Basil. Omme by Olferts-nes inne te zeylen, daer sult ghy t'landt soo langhe houden, tot dat Abre Noorden ten westen van v is, soo ismen by westen t'witte Sandt, ende men comt teghen Olferts hauen: Dan voort z. ten w. aen, buyten Basils-sandt om, van daer Zuytwest tot dat Herwitz comt aen den hoeck vande hauen, dan comt Basil ouer westeynde vant roode Clif te staen, daer die beste rede is op vijf vadem. West Noortwest van Abre leyt een banck genaemt Abre knock. Van daer tot de Galper zuydt zuydtoost ontrent acht groote mijlen. Van Galper tottet Voorlandt zuydtwest ten zuyden vier groote mijlen. De vloet loopt aldaer tegens den anderen van by Zuyden ende van by Noorden lancx Enghelandt. Zuyden ende Noorden Maen maect daer volle Zee.
De handelinghe, neeringhe ende veerkeeringhe deser Landen sijn seer overvloedich van alderhande Enghelsche Lakenen, Wolle, Bieren, Smecolen, Brandthout ende andere waren, de welcke sy al wtgheuen. Ende wederomme alle sorteringhe van gesouten Vissche, lijnen Laken ende anders daer teghens wt Hollandt ende Zeelant halende, aldaer verhandelen.
Auteursrechtelijk beschermd
