De zee custen van Enghelandt, tusschen Pleymouth ende Porthlandt.
OMme in Pleymouth binnen den steen door te seylen, soo neemt den slach vant Eylant op vijf vadem met leech water, tot dat de Kercke vant Visschers-dorp inde Westcant vande valleye staet, soo loopt ghy binnen de steen door. Achter t'selfde Eylandt, ende opt landt van Pleymouth staet eenen muer oft heyninge, als ghy dien eyndelinck aensaecht, ende de Kercke vant Visschers-dorp quame aen den Noorthoeck vande valleye te staen, so soudemen recht op de steen seylen, daert mettet leeghe water maer dry vadem diep en is. Men macht achter d'Eylant setten op twaelf oft derthien vadem. Ist datmen in West Colyford wil wesen, salmen Westwaerts seylen tusschen d'Eylant ende t'vaste landt tottet gadt van West Colyford open is, seylen voorts midtswater tusschen beyde Landen in tot binnen den West-hoeck, ende settent daer op neghen oft thien vadem. Item alsmen vant Ramshooft af comt, ende int Cattengadt wesen wil, salmen op den hoeck van Pleymouth aen zeylen, alsoo innezeylende voor by de hauen van Pleymouth, ende settent aldaer midtswater teghens t'Noordtlandt op vier oft vijf vadem mettet leech water. Aen de Westsijde vande Voert onder de Cape van Ramshooft by Noorden, dicht aent landt machment oock setten op thien vadem, wantet aldaer schoon is.
Om in Dermouth te zeylen vertoont hem een roode hoeck aen de Oostsijde van de hauen, ende opt water is een swerte hoeck. Inden rooden hoeck leyt een groote witte steen, als de selue steen comt ouer den swerten hoeck, soo ismen beneffens de blinde Clip, die voor de Voert van Dermouth leyt, d'Oostsijde naest. Maer als ghy de kaye vant Dorp siet, die aen d'Oostsijde vande hauen is, hout dan midtswater inde voert oft hauen dat ghy de Kaye ruym sien moecht, dan zeylt innewaerts tot binnen die twee Slootkens die op de kant vande hauen staen, soo moecht ghy de steen niet bezeylen. Binnen ist een wijde hauen, ende men mach Westwaert op wijcken, ende settent voort Dorp oft de Brouwerije daermen wil. Dry mijlen van daer by Oosten leyt de Rede van Turbay, daermen voor eenen Zuydtwesten wint beschudt leyt, ende by Oosten Gonster setment mede op acht oft neghen vadem, ende is goede ancker grondt.
Vier mijlen by Noorden Turbay leyt de inwijck van Toops, daermen beschudt leyt voor eenen Zuyden wint, ende is goede ancker gront op seuen oft acht vadem. Die van by Westen comen, ende in Porthlant begheren te zeylen, loopen by Porthlant lancx op twee Cabels lengte, ende zeylen om den hoeck Westwaerts op voort Slodt, daermen voor eenen zuyden ende zuyden ten oosten windt beschudt leyt, op seuen oft acht vadem. By Noorden Porthlant leyt een tye hauenken, genaemt Weymouth, daermen op vier oft vijf vadem voor setten mach. Ende diet setten willen binnen S. Andries-landt, moeten de Naelden van Pole schouwen, ende zeylen voort Dorp, daerment op dry vadem mettet leech water setten mach.
Dese voors. Landen gheuen sonderlinghe niet wt dan Wol ende Laken, voorts haer ghenerende met groot ende cleyn Vee, etc.
Auteursrechtelijk beschermd
