Verclaringhe op de zee caerte van Enghelandts eynde hem streckende tot Pleymuyden.
OM inde Eylanden van Sorlinghes te zeylen, voor die van by Oosten comt, sal by d'Oostlandt inloopen op acht oft negen vadem, daer leyt een schanse rechts buyten t'slodt. Van daer af leyt oock een steen onder t'water, tusschen welcke schans ende steen men doorseylen mach. Daer ligghen noch twee Clippen aen de Westzijde binnen de hauen: Hout de Clippen ouer een, ende seylt de Noortzijde naest, soo loopt ghy vry ghenoech buyten den hoeck op thien vadem waters, maer comt niet nader. Omme den steen te schouwen die int gadt leyt, soo houdt de Noordersche Clip by Noorden aen de ander Clip dat ghijt effen doorsien moecht, soo sijt ghy dan by Noorden de Clip oft steen die int gadt leyt. Ende alsmen is binnen de voorseyde Clippen die bouen t'water ligghen, soo wijcktmen Noortwaert op binnen t'slodt, ende setten op acht oft neghen vadem. Die in Monsbay seylen wil comende van Lysart af, sal ingaen w.n.w. tot dat hy t'slodt in Monsbay siet staen op een hooge ronde Clip, ende sal alsdan recht by Westen t'Slodt op de Bay aen seylen, tot dat hy siet een Eylandeken aent Westlandt daer twee stompkens op staen, als warders of Baeckens, ende sal dicht by d'Eylant oft Clippe (want het daer schoon is) inneseylen, ende laten t'Slodt een groot stuck (wantet daer seer vuyl is) ligghen aen de rechter hant. Comende binnen d'Eylant oft Clippe, sal hem als dan openbaren een groote Santbay, daerment op seuen oft acht vadem setten mach, daermen beschut leyt voor een z. ende z.z.o. windt op ses oft seuen vadem.
Die in Falmouthe seylen wil, moet by d'Oostlant in op twee Cabels lengte om te schouwen de steen die int gadt leydt. Ende staet achter inde hauen een bosch boomen diemen houden moet ouer den Noorthoeck van t'Westlant. Daer staen oock twee witte Crijtplecken beneffens de boomen diemen mede ouer den voors. hoeck houden sal, ende seylen alsoo midden op t'hooghe Westlandt aen, ende settent aent Noorteynde vant hooghe landt op vijfthien vadem. Die verder innewaerts wil seylen, moet nae d'Oostlandt op den inwijck aen, om de bancke die vant Oostslodt af loopt midden lancx de hauen, ende settent aent Oostlandt onder de banck op acht oft thien vadem. Item Foy leyt aen een groote inwijck, ende is een tye hauen, alwaer op elcke sijde vande hauen eenen toren staet, diemen tusschen beyde Landen midtswater inne seylen sal. Maer aen de Westsijde ist breetste water tusschen de staken ende den toren die aen t'Westlandt staet. Ende ist dat ghy by t'Westlandt inne comt binnen de staecken, moet ghy een weynich afwijcken ende seylen by naest midtswater, maer t'Westlandt naest tot voor t'Dorp daermen met leech water vlodt legghen mach.
Hier is sonderlinghe gheene traffijcke oft hanteringhe, dan allenlijck van witte Lakenen ende Kerseyen. Voorts ist volck aldaer hem meest ghenerende mettet Vee ende Zeevarende handelinghe.
Auteursrechtelijk beschermd
