Van Andaluzie, ende die hauenen der seluer zee custen.
VIer mylen by Oosten sinte Michiels leyt Saltées, al waermen inde groote Condaet seylt, men mach wter Zee t'Wester-gadt inne loopen, ende houden Guelua, by ons Wolues ghenaemt, ouer den Oosthoeck vande hauen, seylende voorts innewaerts tot Saltées. Ende soomen by t'landt wilde innecomen, salmen tottet Westeynde vant witte Cliff aen landt loopen neffens den grooten boom die by Westen t'Cliff staet, ende houden den hoeck vande hauen ouer den toren van Odier, ende zeylen alsoo op een Cabels lengte beneffens t'landt, tot dat ghy binnen t'Eylandt comt, seylende alsdan Noortwaerts op tot Palos, al waerment op vijf oft ses vadem setten mach.
Van Saltées acht mylen z.o. tot Chipiona, al waerment op twee Cabels lengte na by t'lant in seylen mach, tot inde riuiere van sinte Lucas de Barrameda, maer alsmen een weynich binnen de tweede droochte is, salmen vant Zuydt-landt afwijcken tot dattet Clooster ende de groote boom ouer een zijn, ende so seyltmen voor de Stede van sinte Lucas. Omme t'rechte diep van sinte Lucas te treffen, sedt den voorschreuen grooten boom ouer d'Oosteynde vant Clooster, ende seylt alsoo recht wt ende in: Ende als Chipiona z.z.w. van v is, t'slodt ende den toren ouer een comen, soo zijt ghy beneffens den eersten steen oft droochte. Voorts om te weten die mercken vanden steen oft droochte die int gadt van S. Lucas ligghende sijn, als de Molen ende t'witte Clooster staende opt Oosteynde van S. Lucas ouer een comende, sult alsdan daer recht op zeylen, maer hout de Molen een spaeck lengte by Noorden t'Clooster, soo loopt ghy t'beste Diep in, welck met de halue vloet diep is vier vadem. Binnen ist wijdt ende breet, ende men settent voor t'Kercxken dat Noortwaerts op de strant staet op thien oft twaelf vadem.
Van Chipiona tot Calis-malis seuen mylen Zuydtoost, tis daer wijt ende breet om in te comen, men mach loopen op twee Cabels lengte by de Puerquos in. Die vanden Noorthoeck van Calis af ligghen ontrent een half myle. Van daer ontrent een groote half myle Noordtoost ten Noorden, leyt eenen steen onder t'water, ghenaemt de Diamant, t'Kercxken van S. Marie comt alsdan tusschen eenen groten hooghen Berch. Die van Calis innewaerts wil, sal aengaen Zuydtoost ende seylen achter t'Puntal, daermen beschut leyt voor alle winden. De Bay van Calis is wijdt ende breedt, men leyt aldaer op vijfthien oft sesthien vadem, den Noordtwesten windt comt daer open in. Van Calis tot de strate van Gibraltar (by onse Schippers Jubileter genaemt) acht mylen. Van daer tot de Rede oft hauen van Gibraltar ist dry mylen, t'welck is een schoone Bay daer veel Schepen inne ligghen moghen. Ontrent den hoeck van Tarrifa, oft die straet een half myle van landt leyt een bancke niet dieper dan anderhalf vadem, die ghy schouwen moet.
Dese Landen gheuen wt alderley costelijcke Wynen, Vruchten ende andere waren, Secken, Bastaert, Romanye, Vijghen, Rozynen, Olie, Olyuen, Granaet, ende Orangie appelen, Suycker, Jndiaensche huyden, ende ouervloedicheyt van goet Sout.
Auteursrechtelijk beschermd
