Zee Custen van Algarue, by onse schippers Algarben ghenaemt, t'zuyderste deel van Portugael.
ITem aen de Cape van S. Vincent machmen beschut ligghen voor een Noorde ende Noordwesten windt. Twee mijlen van Lanes leydt een blinde Clippe, ende daer by Zuyden een groote mijle leydt Villanoua, die daer begeert inne te wesen, houde de maste metten toren (staende op d'Oosterlant) ouer een, ende zeylen by d'Oostlandt inne tot voor by den toren, ende wijcken dan Noortwaert op voor de stede van Villanoua voorszeit al waer een groote banck leyt aen de Zuytzyde, int innecomen vant gat is maer twee vadem waters met de halue vloet, ende is aen de Noortzyde seer banckich. Ontrent ses mijlen by Oosten is ghelegen de stede van Faro, alwaer een vuyr toren op de strandt staet, daer een Riff vanden hoeck af streckende is, welck men schouwen moet, men sal van by Oosten innezeylen, latende den toren aen de slincker, ende de strandt van Tauilé aen de rechter handt. Vier mijlen by Noorden Faro leyt Tauilé, is een crom drooch gadt, welckmen eerst moet bebakenen al eermen daer inne zeylt, tis op de halue vloet niet dieper dan vijf oft ses ellen, ende t'verloopt alle Jaren. Vier mijlen van daer by Noorden leydt Aimonte, tis een goede hauen, men comter dweers wter Zee in: ende by d'Oostlandt streckt mede een gadt dichte by de strandt in, binnen ist wijdt ende breet, men mach na Castromarin ende Aimonte zeylen, ende settent daermen wil op vijf ende ses vadem.
Vijf mijlen daer by Oosten leyt het gadt van Leep, welck by naest alle Jaer verandert. Twee mijlen van daer by Oosten leyt t'gat van S. Michiel, ende comt dweers wter Zee in loopen, ende alsmen voor S. Michiel is, machmen met cleyne Schepen ouer t'Wadt zeylen tot de voorsz. stede Leep, ofte Cartaia al waermen de goede Bastaert ladende is.
Dese hauenen gheuen wt Vijghen, Olie, Curck ende Wynen, oock soo is tot Lanes een groote Latoen oft visch vancxte die meest na alle de steden van Leuanten, door de strate van Gibraltar ghevoert, ghesleten ende gheuent werden.
Auteursrechtelijk beschermd
