Zee Custen vant vermaerste deel van Portugael, vande Barlinghes tot voorby S. uves.
VAnde Barlinghes tot Roxent z. ten o. ende o.z.o. sijn twaelf mylen: Een myle weechs oft daer ontrent by Oosten Roxent leyt de Rede van Cascalis, daermen voor een Noorde wint op thien oft twaelf vadem setten mach. Die van Cascalis in de Riuiere van Lisbona seylen wil, sal by t'Noortlant henen seylen ende schouwen den eersten swerten hoeck ontrent een Cabels lengte, ende seylen dan op den hoeck van S. Gielis, opt vierde paert van een Cabels lengte, maer wacht v met stil weder int voorschreuen gadt te comen met een ebbe, want die seer sterck valt op de Noorder Chopas. Als ghy binnen S Gielis sijt, soo seylt al passelijck beneffens t'Noorderlandt tot binnen t'Slodt van Restiers, ende settent voort Dorp Bolin op twaelf oft derthien vadem.
Omme t'Craecke diep van Lisbona inne te seylen, salmen t'west eynde van Roxent houden ouer Cascais ter tijt toe dattet Clooster dat by Westen Restiers opt hooghe staet, comt ouer een torenken dat daer by Noorden op t' lant staet: ende seylen alsoo op S. Catelynen Clooster aen, ontrent n.o. ende n.o. ten o. tot dat ghy twee deelen waters aen de Zuytzijde van v hebt, alsdan na Restiers toe seylende tot binnen t'Slodt, ende settet aldaer waert v best duncken sal.
Om t'voors. Craecke diep wt oft in te laueren, salmen t'voors. torenken twee masten lengte by Zuyden, ende twee mast lengte by Noorden t'Clooster brenghen, ende wendent dan telcke reyse so wanneer de mercken soo staen tot datmen comt in S. Catelynen Bay.
Die S. uves voor de banck seylen wil, houde d'eerste hoeck die by Westen Zizembre ley, een Schips lengte buyten den hoeck die by Oosten leyt, tot dat hy siet comen een wit huys ouer t'Slodt ligghende op de waterkant, soo sal hem t'Slodt van Palmelo openbaren in een groote valleye. Hout dese mercken alsoo staende, ende zeylt n.n.o. ende n.o. ten n.in, tot binnen t'Slodt dat opt water staet, ende alsdan op een Cabels lengte beneffens t'Noorderlandt tot voor S. uves toe. Item daer sijn seuen ondiepten oft droochten op de bancken van S. uves, al waermen mette vloet vier vadem waters heeft. Welcke bancken by Zuyden drooch sijn, ligghende bycans bouen d'water: T'gat by t'Zuytlandt in, is allenlijck voor Barcken. Ende men settet voor die stede van S. uves op ses oft seuen vadem.
In dit deel van Portugael is de handelinge ende traffijcke soo groot ende menichvuldich, datter bycans in Europa sijns ghelijcke niet en is, te weten van alle soorten van Speceryen, Suycker, Silver, Gout, Wijn, Olie, Sout, Yuoire, Conchenille, Brezilyhout etc. ende van andere waren die ontallijck sijn wt beyde de Indien daer arriuerende, die door geheel Europa vervoert, vercocht, ghesleten, ende gheconsumeert werden.
Auteursrechtelijk beschermd
