Custen vant noorderste deel van Portugael, hen streckende van Viana tot C. de Montego.
ONtrent dry mijlen by Zuyden Bajone staet een Clooster opt strant, van daer vijf mijlen leyt de Riuiere van Viana, voor de welcke een groote steenbanck leyt, omme de selue te schouwen zeyltmen so verre Zuydtwaerts dat de twee vier toornen staende op de Zuydlant ouer een comen, op welcke mercken salmen den strandt op vier oft vijf vadem moghen aenzeylen, ter tijt toe datter twee huysen ende een torenken staende opt Noordtlandt ouer een comen, ende zeylen alsoo beneffens den strant by O de Clip, daer de stenghe oft maste opstaet tot dat de Riuiere open is, ende zeylen dan innewaerts by Zuyden de tweede Clip metten mast, ende wijcken alsdan Noortwaerts op voor Viana, ende settent op vier oft vijf vadem. Int innecomen is een Banck van twee vadem waters. Vijf mijlen by Zuyden Viana leyt Villa del Conde, alwaer voor de hauen veel rudtsen ligghen diemen aen beyde zyden om zeylen mach, ende is diep vijf oft ses vadem, verder innewaerts leyt een Banck dweers ouer de hauen, diep twee vadem: binnen welcke hauen het diepste is dry oft vier vadem, maer Zuydtwaerts op ist diepste, tis een tye hauen aen de Noortzijde vol rutsen ende clippen.
Dry mijlen by Zuyden Villa del Conde ligghen de groote wtclippen van Lesons, gheleghen een half mijle by Noorden de riuiere van Port de port, diemen van beyde sijden inne zeylen mach, ende settent op ses oft seuen vadem is goede ancker grondt, ende z.w. vanden zuythoeck der voorschreuen Clippe een half mijle leyt een blinde Clippe onder t'water. Achter de voorschreuen wtclippen leyt een tye hauenken genaemt Metellin, diep twee vadem. Een mijle by Zuyden de Clippen van Lesons, is de riuiere van Port de Port, diemen van by Noorden innezeylt, men laet alle de Clippen aen de Noortzijde vande riuiere, ende zeylen by t'Zuydtlandt o. ten n. inne tot binnen de Clip daer een Cruyce op staet, ende voorts midtswater tot de stede van Port de Port, tis binnen diep thien oft twaelf vadem, ende t'innecomen is dry vadem mettet half vloet, men mach oock van by Zuyden lancx de strandt inne comen op dry vadem met hooch water.
Van Port de Port tot Aueiro acht mijlen, tis beneffens die strant al meest Duynlandt: by t'gadt van Aueiro zijn de Duynen ruychachtich, ghy moecht de strandt op thien oft twaelf vadem aenloopen. Te landtwaerts opt hooghe is eenen swerten hueuel oft berchsken, als t'selfde o. ten z. van v is, sijt ghy recht voor de riuiere van Aueiro, als ghy comt op ses oft seuen vadem, siet ghy dry masten op de strandt die ghy ouer een houden, ende soo innewaerts zeylende ontrent o. ten z. ende o.z.o. tot dat ghy by de masten aent voetsandt comt, wijckt alsdan Noortwaert ouer dicht aent Noorderlandt, soo laet ghy alle de ondiepten aen de rechter hant, tot dat ghy de riuiere open hebt, gaet dan weder o.z.o. tot Aueiro, tusschen beyde landen midtswater, tis int innecomen op de banck maer twee vadem waters mettet halue tye, ende tis binnen diep vijf oft ses vadem
Vijf mijlen by Zuyden Aueiro leyt de Cape van Montego, ende een mijle by Zuyden den hoeck van Montego, leyt een tye hauen, ghenaemt Pisage, van daer een half mijle weechs Westwaerts in Zee leyt een banck diep ses vadem daermen onder rijden mach op twaelf oft derthien vadem. Onder de Barlinghes (die in de navolghende van dese Caerte ghestelt sijn) teghens t'Heremijts-huysken op thien vadem machmen mede setten, ende is goed anckergront.
Dese Landen gheuen wt veel Wijnen, Orangiappelen, Olie, Olyuen, voorts comter veel schoon Souts wt de hauen van Aueiro: Ende Port à Port is daer de meeste Coopstadt.
Auteursrechtelijk beschermd
