Verclaringhe vande custen van Ribadeo, Biuiero ende Luarco.
VAn Auiles tot Luarco sijnde ses mijlen, z.w. ten w. is een hauen voor cleyne Schepen, streckende z.o. in, d'Oostsijde is vuyl, ende de Westsijde schoon. Van Luarco tot Ribadeo Zuydtwest ten Westen is een goede hauen voor alle Schepen, op de Weststijde vande hauen staet eenen scherpen toren: van daer weynich t'Zeewaerts leyt een blinde Clip onder t'water. Ende als ghy voor aen in de hauen comt, soo sult ghy noch twee toornen sien op de Westsijde vande hauen, d'een op de hoochde en d'ander beneffens t'water: maer houdt al midtswater tusschen beyde landen, tot dat ghy beneffens d'eerste oft naeste toren binnen de hauen comt, soo moecht ghijt setten aen beyde sijden daert v beste dunckt. Maer de Westsijde is t'diepste, te weten vier, vijf oft ses vadem, hen tot Ribadeo toe, ende leyt in een groote inwijck.
Van Ribadeo tot Capo de Bryl is n.w. ses mijlen. Recht by westen de Caep leydt C. Cypriaen, daer voor ligghen twee groote ronde Clippen. Een mijle by Westen leydt een Eylant dweers voor de hauen van Biuiero, ende men macht aen beyde sijden om zeylen: maer van by Westen ist best inne te comen, ende men settet aldaer om de westhoeck op ses oft seuen vadem. Twee mijlen by Westen S. Cypriaen leyt de Rede van S. Marcus, ende is een schoone Bay oft Inwijck, daer van noch twee mijlen by Westen leyt een hauenken ghenaemt Quirijn, is vuyl aen de Westsijde, ende schoon aen de Oostsijde om inne te comen. Dry mijlen by Westen Quirijn is de wthoeck van Ortegael, al waer een Slodt staet daerment setten mach, ende beschudt ligghen voor den Westen ende Zuydtwesten windt.
In dese Landen vallen veel goede Wijnen van Ribadarid, Rode pilletten, appelen van Orangien, Duytsche appelen, Peren, Castangien ende andere Fruyten, seer ouervloedelijck die alle tot verquickinghe des menschelicken leuens ende ghesontheyt dienen.
Auteursrechtelijk beschermd
