Zee custen van Rio de Sella tot Auiles.
SEs mijlen by Westen Lhianes leydt Rio de Sella: die daer in wesen moet, sal gade slaen op eenen mast die opt Oostlandt staet, ende moet daer dicht by in, want de Westsijde is binnen vuyl, ende men salt setten binnen de mast voort Dorp, tis een tye hauen.
Thien mijlen by Westen Rio de Sella leydt Villa Viciosa, ghy moet by t'Westlandt inne, want d' Oostkant is vlack ende vuyl: daer leydt een plaetken recht binnen de hauen, ende is met leech water bouen. Is mede een tye hauen. de Plecke leyt aen de Westsijde, daer machmen naer toe zeylen, ende settent neder opt vlacke water.
Item ses mijlen by Westen Villa Viciosa, leydt den wthoeck van Sanson, daer een Eylandeken by Westen leydt met een torenken, ende is tusschen beyde goede Rede ende ancker grondt op seuen ende acht vadem. By westen Sanson is mede goede Rede op ses ende seuen vadem, recht voor t'hauenken van Sanson.
By westen Sanson leyt Gyon, ende heeft een Piere oft' afstekent hooft daer d'inwoonders haer visschers barcken onder legghen. Een groote mijl daer by westen leydt d'inwijck van Tores, daer goede Rede is op acht ende neghen vadem: op den wthoeck staet eenen hooghen toren. Van daer twee mijlen by westen vintmen de Cab de Pennas. Van daer veel Rudtsen of leggen. Van daer tot Auiles twee mijlen, ende is de beste hauen van alle dese Custen: daer staet een Capelleken op d'Oostsijde, daer men dicht by den hoeck inne zeylen moet, tot datmen comt binnen die twee Clippen daert ruym ende breet is, want vanden Westhoeck loopt een Riff af, ende streckt binnen lancx de hauen na dat stedeken. Tis daer aen beyde sijden seer ondiep, ende aen de Westsijde vande hauen ligghen twee groote Clippen oft wtrudtsen recht voor dat Kercxken inde Santbay.
In dese contreyen ende Landen is meerder vruchtbaerheyt dan in Biskayen van Fruyt, Wijnen ende andere goede Coopmanschap.
Auteursrechtelijk beschermd
