Zee custen tusschen Laredo, ende Sentillana.
VAn Castro tot Laredo vijf mijlen Westwaerts, die binnen den Inwijck zeylen wil, sal den berch van S. Antonio z. ten o. van hem setten, ende zeylen alsoo by t'landt van S. Antonio in, tot datmen is binnen den hoeck vant Oostlandt, ende loeffuen dan Oostwaerts op, tot voor t'Dorp van Laredo, ende settent op ses oft seuen vadem. Wilt ghy inde hauen wesen tusschen de twee mueren, soo moet ghy mettet hooch water inne comen, het is een hauen voor Barcken. Midden voor de hauen van Laredo leyt een droochte die men altijt siet barnen, men machse aen beyde sijden om zeylen. Van S. Antonis berch tot S. Ander is vier mijlen, men zeylt beneffens t'Westlandt lancx tot de groote Clip daer een huysken op staet, daer men aen beyde sijden omme loopen mach. De hauen van S. Ander streckt eerst in n.w. ende is ses oft seuen vadem waters diep.
Item vier mijlen van S. Ander leyt S. Martijn, ende is een tye hauen die seer nauwe is inne te seylen, ende verdeylt hem binnen in twee Kolcken ofte Riuierkens. Ende vijf mijlen by Oosten S. Martin leyt S. Vincente mede een tye hauen, ende daer leydt een Clippe aen de Westlandt vant gadt, daer comt vande Oostzijde een Rifken afloopen, men moet tusschen 't Rifken ende de Clippe door daert seer nauwe is: Binnen ist een ronde kolcke, spruytende wt een Riuierken ofte affwateringhe. Item dry mijlen by Westen leydt Lhianes mede een tye hauenken, daer leyt een bancke binnen inde hauen aen de Oostzijde, men moet aen de Westzijde vande banck inne loopen, is mede een affwaterken.
De handelinghen ende traffijcken van dese Landen zijn ouervloedicheyt van Wolle, Yser, Castaengien ende appelen van Orangien, Staele ende Harpuyse daer mede sy luyden haer gheneren.
Auteursrechtelijk beschermd
