Custen van Acason ende Bayonne, mettet oostersche deel van Biscayen, tot Castro toe.
ONtrent achtien mijlen by zuyden de Riuiere van Bordeaux, leyt een hauen ghenaemt Acason, daer ligghen twee groote Clippen voor t'gadt, dan by Noorden ist wijdtste om in te comen: men moet den binnen hoeck vande hauen wat schouwen, want die vuyl is, ende is int innecomen vijf vadem diep, Noortwaert op ist diepste ende schoone gront, ende Suydtwaerts op ist seer vuyl, daer wel op te letten staet: men mach mede by Zuyden tusschen t'vaste landt ende de Clippe midtswater door inde voorghenoemde hauen van Acason comen.
Item veerthien mijlen by Zuyden Acason leyt de hauen van Bayonne, die wijt ende breet is om in te comen, men houdt den toren aen den Noort-hoeck vant landt, ende zeylen alsoo tusschen de vuylen oft Clippen ende den hoeck vant landt in, ende settent om den hoeck voort Dorp op vier oft vijf vadem. Van daer tot S. Juan de Luz, zeyltmen by Zuyden, ende binnen de Clippen door dry mijlen, ende strect innewaerts z.o. ende z.o. ten z. alwaer een Berch is met een sale diemen z.o. van hem sedt, de Plecke leyt in een groote inwijck, daer Fuenterabia mede gheleghen is op een Riuiere ende versch water, van S. Iuan de Luz, tot Passaie vijf mijlen w.n.w. Van daer twee mijlen Westwaert zeyltmen inde hauen van Otera streckende z.z.o. innewaerts, daer in comende ist diep dry vadem, ende is binnen een wijde Voort, maer tis een tye hauen. Vier mijlen by Westen Otera leyt Bilbao, inne streckende z. ten o. men mach alsmen binnen zijn Oostwaerts op wijcken, daert vier oft ses vadem diep is. Aen de Zuytzijde vande hauen leyt een Eylant, daer een vuyr-toren op staet diemen z. ten o. van hem sedt in innecomen, ende is aldaer dry vadem diep.
West z.w. ende z.w. ten w. van Bilbao vijf mijlen, leyt Machichaco een goede hauen van by Westen innestreckende z.o. ten o. ende is diep acht oft neghen vadem, daer leydt een Clippe int midden vant gadt diemen aen Backboort laet ligghen, men mach by Oosten de Clippe mede inloopen, maer daer en is niet dan dry vadem waters: Tis binnen wijt ende breet, men macht setten daermen wil op acht oft negen vadem. Dry mijlen Westwaerts van Machichaco leyt Castro, ende streckt geheel westelijck in: ontrent z.w. aldaer leydt een Clip inde middel diemen op ses oft seuen vadem aen beyde sijden om zeylen mach, de engte strect aldaer Zuyden door, men mach Oostwaerts op wijcken ende settent op thien oft twaelf vadem.
Dese hauenen leueren wt Hers, Castaengien, Yser ende Wolle, Orangie appelen, Noten ende Stael, t'welck haerlieder handelinghe is.
Auteursrechtelijk beschermd
