Zee custen van Picquelier, Rochelle, Bruagie, mette eylanden, clippen ende ondiepten daer onder gheleghen totte riuiere van Bordeaux, ghenaemt la Garonne.
EErst omme van Heys naer de Kiliaets te seylen, gaetmen o. ten z. ende o.z.o. tot binnen de Baer van Olone daermen rontsomme seylen mach: die ghepasseert sijnde salmen beneffens t'vaste landt van Poictou henen seylen, ende laten tweede deel waters na t'Eylant van S. Marten ligghen, tot dat Vrck, soo onse Schippers dat noemen, buyten den hoeck van Duynlandt comt, dan sietmen een torenken met een bosschagie op t'landt vanden Bos staen, houdt dat torenken int bosschagie soo langhe staen, dat den toren opt landt van Poictou, diemen de Loper noemt, comt ouer Vrck, ende houtet soo staende tot dat Rochelle comt buyten den hoeck vanden Bos, soo sijt ghy de Lauerdin ghepasseert: ghy moecht dan Poorthuys wel weder wtloopen, oft settent onder t'landt vanden Bos op ses oft seuen vadem.
Omme de mercken van Lauerdin te weten, soo houdt Rochelle een Schip lengte buyten den Bos, soo moecht ghy de Lauerdin niet beseylen voor de ghene die het onder den Bos setten wil, maer die onder de Abdye van S. Martijns Eylandt begheert te setten, sal houden t'voors. Clooster recht buyten de sandthoeck vant selue Eylandt loopende alsoo inde sandt-Bay op d Oostzijde vant Clooster, sal alsdan de Lauerdin niet beseylen: Daer is de Rede voor schepen die wt willen seylen.
Item Porthuys is wijt ende breet, streckt inne o.z.o. van S. Martijns Eylandt tottet brandende Eylandt z.o. ten o. dry mijlen, van daer tot d'Oesterbanck z.z.o. ende houdt dat torenken van Hers in dat West eynde vant Bosch, soo langhe als t'root Pannenhuysken staende op de Zuytzijde vande Riuiere van Xarante, comt aen den toren le Four ghenaemt, ende gaen alsdan o.z.o. ende z.o. ten o. tot dat Soubise comt aent graeuwe Dorp, t'welck opt water leyt, soo comet torenken van Hers recht aen de Oostzijde van een valleye int bosch van Hers, ende seylt dan z.z.o. op de mercken, ende houdt het torenken inde valleye ofte op d'Oostkant van dien staende, houdt oock d'Oostersche torenken van Hers inde witte sandt plecke. Dat zijn de Landtmercken omme Brouagie op ende af te seylen tot d'Ousterbanck: Omme te weten wanneermen buyten de Kriecke van Brouagie is, soo comt een root Pannen-huysken ouer de plompe toren van voren, ende soo ghy wtwaerts aen moest laueren tottet brande Eylandt, soo en brengt de toren van Rochelle niet buyten t'Eylandt, voor ende al eer ghy daer by sijt, om de Banjarts wille die lancx t'Eylandt van Oleron loopt, ende comt mettet leech water bouen, ende de Rede is onder t'brandende Eylandt, daerment sedt om ballast te werpen op twaelf oft derthien vadem.
Omme de Riuiere van Bordeaux, ghenaemt la Garonne in te seylen setmen den toren van Cordam o.z.o. wel soo Oostelijck van hem, ende op d' ander sijde vande Riuiere is een hooghe roode Duyn, die sedt n.o. van v, ende seylet n.o. in, tot dat ghy comt by de Duyn aen Noortlandt, alsdan een stuck weechs beneffens t'selue seylende tot binnen de Riuiere aen de Noortzijde, ende settent voor Rojanen op ses oft seuen vadem, ende is voorts Lootsmans water: By Noorden de Riuiere sijn de Duynen root ende hoochachtich sonder boomen. Dry oft vier mijlen besijden de Riuiere is leech Duynlandt met sommighe Bosschagien ende boomen.
Op dese voors. hauenen is groote handelinghe t'gheheele Jaer door van grof Sout ende Wijnen, die van daer in grooter menichte ghescheept ende ghehaelt werden, Rochelle is aldaer de vermaerste Coopstadt.
Auteursrechtelijk beschermd
