Zuyt Custen van Bretaignen tusschen Blauet ende Picqueliers daer onder Belysle, welck ons schippers Boulijn noemen, ende Groye mede gheleghen zijn.
OMme in Blauet te zeylen als den Oosterhoeck vant Eylandt Groye z. ten w. van v leyt ismen recht voor t'gat, ende streckt inne n.n.o. ende men leyt aldaer beschut voor alle winden op ses oft seuen vadem. Int innecomen vant gadt ist diep vier vadem, daer sommighe ondiepten liggen diemen schouwen moet: Op de Westsijde vant gadt staet eenen grooten scherpen toren: ende onder Groye is oock goede ancker grondt voor een Zuydtweste wint op seuen oft acht vadem, maer wacht u van het Zuydtoost eynde, al waer vuyle grondt is.
Om Rede te maecken onder t'Eylandt van Belysle, machmen aen beyde zijden alsoot breet ende wijt is inneseylen, ende settent beneffens t'scherpe torenken van S. Pauwels op thien oft twaelf vadem, ende de windt wten n.w. comende oft n.n.w. moetmen alsdan ruymen opt Oosteynde voor S. Helene, al waert mede goede Rede is op thien vadem: Ende voorts de windt comende wt den Suyden ende z.z.o. moetmen alsdan weder wijcken onder t'voorghenoemde scherpe torenken van S. Pauwels. Ontrent anderhalf mijle van Belysle ligghen dry Eylanden, daer van t'middelste een goede hauen heeft, men mach daer al door seylen van d'een Eylandt tottet andere, ende is tot sommige plaetsen goede Rede. Van daer ontrent twee mijlen ist vaste landt, alwaer twee groote inwijcken oft Riuieren liggen, daer van men tusschen t'vaste landt ende de voors. Eylanden achter Belysle ligghende doorseylen mach tot Croeswijck oft Corisil, ende oock op de riuiere van Nantes ghenaemt de Loire.
Vant Oosteynde van Belysle tot Croisil, ist ontrent acht mijlen o. ten n. ende o.n.o. van daer tot de riuiere van Nanters ontrent dry mijlen: Omme de selue Riuiere op te seylen, salmen op dry Cabels lengte by t'landt van Croisil lancx loopen tot binnen de Clippe mettet gadt, diemen ghelijck een Poorte doorsiet. Alsdan by 't Noorder landt langhes op twee Cabels lengte, zeylende recht op den hoeck daer de scherpe toren op staet, tot datmen is binnen de Clippen ghenaemt les Pourceaux, die midden inde Riuiere tusschen de Clippe mettet gadt ende den toren ligghen: Binnen den seluen toren ghenaemt S. Nazareth, gearriueert sijnde salment setten op thien oft twaelf vadem, ende aldaer een Lootsman inne nemen omme de Riuiere vande Loire naer Nantes op te zeylen. Item anderhalf mijle vaden hoeck van Croisil ligghen bancken t'Zeewaerts, ende men mach tusschen t'landt van Collecte ende de bancken doorzeylen tot inde Baye van Armentier.
Item die inde Baye van Armentier zeylen wil vant Oosteynde van Belysle sal aengaen Oost ten Zuyden tot d'Abdye van Armentier, daer leyt een Bosschagie boomen te landtwaerts inne ouer t'selue Clooster, seylt alsdan soo langhe o.n.o. tot dattet Bosch comt een stuck weechs by Noorden t'selfde Clooster is, dan moecht ghy aen de sanden, ghenaemt de Monicke leghe niet misdoen, zeylt dan Oostwaerts nae Peter Menne, een Clip also ghenaemt diemen aen beyde sijden omme zeylen mach, ende settent recht binnen de voorghenoemde Clippe op ses oft seuen vadem. Voortaen ist Lootsmans water. Picquelier leyt recht op den hoeck van Armentier: van Picquelier tottet Eylandt Heys ofte Hoye z. ten o. onder t'selue Eylandt is quade Rede, want men aldaer niet beschudt en leyt dan voor een z.w. ende w.z. westen windt, ende het rauelt daer altijt seer.
Dese Landen ende Hauenen leueren wt by naest een gheheel Jaer door, Wijnen, widt Lijnwaet, Grainen, Pruymen van Damast ende Castaignen: Nantes is aldaer de vermaerste Coopstadt, alwaer de goede Wijnen van Orleans de Riuiere nederwaerts ghebracht werden.
Auteursrechtelijk beschermd
