Vant Conquest, Brest, Fontenau, de wonderlickste custen van Bretaignen.
EEn mijle by Oosten les Fours ligghen veel swarte Clippen lancx t'landt die onse Schippers de Backouens noemen, ende achter de selue Clippen veel witte Santbaykens, ende is leechachtich landt, alwaer altemet een drommelken huysen op staen.
Item om die Voort te treffen, so sult ghy op twee Cabels lengte by de Clippen vande Backouens lancx seylen, ontrent z.z.o. ende houden S Mattheus Clooster inde leege valleye by Oosten Conquests oorde, ende soo voorts innewaerts tot Blancke hauen oft Conquests oort, alsdan een weynich afwijckende dat S. Mattheus Clooster effen buyten conquests oorde comt, ende seylen een Cabels lengte daer beneffens, so moecht ghy op de Bel (die ontrent dry Cabels lengte dweers van Conquests oorde af leyt) niet misdoe, maer hout de Flamenesbay recht by westen Blancs Moines: Ende als ghy t'Conquest open sien moecht, so zijt ghy neffens die Fenestiers die vanden Oostkant van Conquests hauen af legghen onder water: Ende oft ghy van buyten in laueren moeste, soo brengt S. Mattheus Clooster recht buyten den hoeck van Conquests oorde, ende wendent dan weder om de Hagles die ontrent een derde paert vande wijde des waters van Heyssant ligghen: Ende tusschen de Fenestiers hier bouen verhaelt, ende die Blancs Moines is die Reede op ses oft seuen vadem onder S. Mattheus hoeck.
Die van S. Mattheus hoeck ouer nae t'Raes van Fontenau seylen wil, moet vande Blancs Moines z. ten o. aengaen, dat hy comt voor de Keyser ende Keyserinne, en seylen de Keyser niet te naer: om oorsaeck der rutsen die daer af onder water ligghen, ende letten wel om vande stroomen niet verleyt te werden, want die ghemeenlicx dweers op de Keyserinne valt, ouer t'Calf welck vande Keyserinne als een Riff afstreckt, ende t'rauelt daer altijt seer. t'Raes van Fonteneau streckt in Zee z.z.w. Item Bredesondt strect van S. Mattheus hoeck af in Zee West ten Zuyden vier mijlen: die mercken om van S. Mattheus af te loopen ouer t'Raes nae de Keyser, is de molen van Fenestiers recht bewesten aen Mattheus Clooster.
Omme van S. Mattheus hoeck nae Croixduynen te seylen, gaet aen o. ten z. ende hout dat ghy de Zuyderste vande Cheminees, die wy Kimmenes noemen, effen buyten de Blanc Moines sien moecht ter tijt toe dat ghy voor de bay van Croixdunen comt, ende t'Capelle op de Cingel siet staende, op welcke Capelle ghy aen seylen moecht, omme aldaer op neghen oft thien vademen te setten: Item teghens Croixdunen ouer aent Noorderlandt leydt Bertrams-bay, seer goede Rede voor den Noorden ende Noortwesten windt. Oock moecht ghy van daer innewaerts seylen voor de hauen van Brest, maer daer leyt een Clippe ghenaemt de Baghyne recht binnen d'Oosthoeck van Croixduynen af, ontrent Midtswater aen de Noortzijde ist best daeromme te loopen. Voorts die inde hauen van Brest oft Landerneau wilt wesen, moet schicken Lootsluyden in te cryghen wanttet Lootsmans water is.
Item de Collegnier leyt van S. Mattheus hoeck z.z.o. ontrent anderhalf mijle: de Fouquenessen liggen vanden Westhoeck van Croixduynen ontrent w.z.w. een vierendeel mijls, de Suyderste Fouquenes leyt vande Noorderste z.z.o. ontrent een half mijle, ende loopt mettet hooch water onder, ende n.n.o. een Cabel lengte van daer leydt een blinde Clippe die mettet leech water effen bouen compt: De selue Suydersche Fouquenes leyt van Croixduynen n.o. ten n. Daer leyt oock een blinde Clippe by westen de Noordersche Fouquenes, ende comt met leeghe water bouen. Item de Henne leyt van Fouquenes West Zuydtwest twee Cabels lengte. De Kieckenen legghen vande Henne ontrent n.w. ten w. ende sijn twee stompkens die mettet leeghe water effen bouen comen. Daer leyt noch een Clippe o. ten z. van S. Mattheus hoeck, ontrent ten haluen Bertrams-Bay aen de Noortzijde van Brust-water, ende leyt op dese Marcken t'Suyderste endt van die Cheminees dichte aen sinte Mattheus hoeck soo sout ghy daer op seylen, maer hout die Cheminees wat buyen, soo seylt ghyse mis.
De wester Penmarque is een tye hauen diemen van by Oosten lancx de strant in seylen moet, ende men laet de groote Clip aen stuyrboort ende settent dicht om den hoeck vande Clippe op dry vadem, ende tis int aencomen buyten de Clippe acht of negen vadem diep. Item men mach achter de Ooster Penmarquen om seylen, ende t'vaste landt is sandt-strandt, al waermen op thien oft twaelf vadem setten mach t'Eylandt Mutting naest, t welcke seer schoon is.
Auteursrechtelijk beschermd
