Zee custen beghinnende van S. Malo, tot voor by de hauen van Ronscou.
EEn Schip comende wt den Westen, begherende Rede te soecken onder Garnsey, sal dicht by de Suytzijde vant landt in seylen, ende settent beneffens die scharpe toren, ofte daert hem best duncken sal op twintich oft vijf en twintich vadem: Van Garnsey tot Jarsey z.o. ontrent vijf mijlen, al waer mede goede Rede is: van Jarsey tot S. Malo ontrent Zuyden ist acht mijlen, ende is een tije hauen daer Clippen voor 't gat liggen, al waer men tusschen door seylt inde Riuiere, ende settent voor de stadt op vijf oft ses vadem: Item twee oft dry mijlen by Westen S. Malo is een bancke daermen onder legghen mach op vijf vadem: Dry mijlen van daer leyt een Eylandt ghenaemt Vriback, daermen rontsomme seylen mach ende Reden maecken, van daer twee oft dry mijlen by Westen leyt de Riuiere van Lantrilliers, hebbende aen de Westzyde veel bancken.
Van daer totte seuen Eylanden twee mijlen, daer achter leyt een hauen ghenaemt Port blancq, diep ontrent ses oft seuen vadem, men mach de voorghenoemde seuen Eylanden rontsomme seylen, daer leyt een droochte Noortwest vant Westeynde vande voorsz. Eylanden ontrent anderhalff mijle weechs van landt ghenaemt Octobers: Een mijle by Westen leyt Vlishauen, anders ghenaemt t'groene Eylandt, daermen aen beyde sijden inne seylen mach, ende is een goede hauen, al waermen voor alle winden beschut leyt.
Vijf mijlen van de seuen Eylanden leyt de Riuiere van Morlais, ende is een tye hauen, men macht aldaer tusschen de Clippen setten op vijf vadem: Twee mijlen van daer leytet Eylandt ghenaemt le Taureau, daermen by inne seylen mach op de Riuiere van S. Pouwels van Lion: tis buyten vol Clippen daerment binnen setten mach op ses oft seuen vadem: twee mijlen by Westen leytet Eylandt Lisle de Bas, daermen aen beyde zijden inne seylen mach tot op de Rede van Roscou, diemen van by Oosten oft Westen op seuen oft acht vadem inne comen mach: van Roscou tot Obeurack vijf mijlen, al waer veel witte sandtbaykens aen de strandt legghen tot goede kentenisse vant landt.
Dese voorsz. Landen hebben haer handelinghe veel mette Portugeusen, van Terwe, Rogghe ende grof lijnwaet, ende andere groue ware.
Auteursrechtelijk beschermd
