Vande eylanden van Ornay, Garnsey, Jarsey, Quasqettes, die onse schippers Kiskassen noemen, met alle die custen ondiepten daer ontrent binnen ende buyten ligghende.
SEuen mijlen by Westen Diepen leyt Vecam, ende is een tye hauen, verder leyt den hoeck van Strusardt, van daer tot Seyn-hooft gaetmen aen z.z.w. een half myle binnen Seyn-hooft leyt Hableneuff, daermen setten mach om metten ghetye de Seyne opwaert te seylen na Roaen, men moet mettet ghetye door d'eerste trauaille oft drooge bancken seylen, ende streckt van Hable tot Honfleur z.o. by t'Zuyder landt lancx: De trauaillen oft drooghe bancken strecken hen lancx de Noort-zyde vande riuiere tot Quillebeuff, alsdan ismen door d'eerste trauaille, maer een yeghelijck wachte hem wel voor de stercke sprinck, by de Normans la Bare ghenaemt, die soo gheweldich ende subijt aen comt, datmen een schip naulijcx aen alle sijne anckers ende touwen houden mach: Dit is al lootsmans water.
Zuydtwest van Seyn-hoeft, leyt een banck van dry vadem, ende voor de Vosse van Caen legghen oock bancken diemen aen beyde sijden om seylen mach inde diepte van Caen, twelck een tye hauen is.
Ontrent ses mylen by Westen leyt Syreborch, twelck eenen wthoeck is, al waermen beschut ligghen mach voor eenen Noortwesten wint, aldaer leyt een banck dweers voor de Bay, diep mettet leech water twee vadem.
Onder Ornay machment setten voor een Noorde ende Noortwesten windt, voor dat tye hauenken inde Sandtbay, op seuen oft acht vadem dicht onder landt.
Omme t Raes van Blancquert in te seylen, moetmen loopen tusschen Cap de haech ende Ornay, midts water ofte waert hem beste dunckt, want men mach by t'Noorlandt lancx seylen op thien ofte twaelf vadem, tot voor by de Sens, wesende een reghel Clippen diemen aen stuyrboort laet, ende settent dan teghens de plompe toren op seuen oft acht vadem. t'Raes van Blancquert strect eerst innewaerts z. ten o. ende z.z.o. Ende soo yemant achter t'groote Eylandt Jarsey loopen wilde, sal ouerslaen nae t'Eylandt toe, ende settent onder t'selfde daert hen goet dunckt, want daer ouer al goet ancker gront is.
Daer is noch een goede rede onder t'vaste landt van S. Malo, ghenaemt Concalle: men mach van by Oosten ende by Westen inne comen daer een steenbancke dweers voor leyt bouen t'water: Tis een grooten inwijck, ende seer goet ligghen op vier ende vijf vadem mettet leeghe water: als ghy op dese rede leght, moecht ghy t'Eylandt Jarsey dweers van v sien ontrent vijf mijlen.
Item soo yemant met eenen Noortwesten wint verleghen ware, ende rede soecken moeste onder Garnsey oft elders, die moet by Westen de groote Clippen vande Quasquettes, ofte kiskassen in seylen na Garnsey of t'Eylandeken Arm ontrent z. ten o. tot dattet slodt, welck beneffens t'water staet comt ouer de Zuyder hoeck vant landt van Garnsey, ende seylen alsoo tusschen t'groote ende cleyne Eylant door, ende settent by Zuyden, oft by Noorden t'slodt daert hem best dunckt op seuen oft acht vadem, ende oft ghijt aen de Zuytsijde vant selue Eylandt begheerde te setten, soo schout den hoeck vant landt, want de Custe vuyl is, ende settent op twaelf oft veerthien vadem. Ghy moecht altijt by Oosten tusschen d'Eylandeken Arm ende Serck wederom wtseylen, oft rede soecken sulcx v ghelieuen sal: Ende tis van Serck tot Cap de haghe, oft trae van Ornay ses mijlen n. ten o.
Dese voorschreuen Eylanden, hoe wel sy aen de Fransche Custen gheleghen sijn, behooren nochtans onder t'ghebiet ende Gouuernement van Enghelandt: die handelinghe is daer seer weynich, alsoo datse ons onbekent sijn.
Auteursrechtelijk beschermd
