Zee custen van Vlaenderen met alle de bancken ende ondiepten hem voor by Calis streckende.
ALsmen wt de Wielinghe seylt na de hoofden, soo sedt de vierbot van Blanckenberch aen den toren, dan comt Westcappel binnen de vierboet van Heys, ende als Lisweghen aen der Does comt, soo sijt ghy inde mont ofte beghinsele vande Wielinghe, gaet dan o.n.o. wel soo Oostelijck in, ende t'rechte diep met half tye heeft ses vadem waters, etc.
By Blanckenberch streckt een sandt (ghenaemt dat Wit-sandt) by landt lancx hen tot Weynduynen toe, daer seylen altemet schepen achter, meynende datse inde Wielinghe sijn, maer om tselfde niet te onderseylen die van buyten in comt, die brenghe de platte kerck van Oosteynde, by Oosten t'voors. sandt, soo moecht ghy de strandt op ses vadem wel aensoecken, ende moecht in sulcker voeghen t'voors. sandt niet onderseylen.
Item als Wtkercke aen Blanckenberch ende S. Catelijn aen Oosteynde comt, soo sijt ghy recht voor de Wielinghe: ende als Sinte Catelijnen toren yeghens Oosteynde comt, soo seylt ghy teghens een droochte, ghenaemt de Trix, ende is vijf vadem waters, ende t'rauelt daer altijt seer vant ouervallen vande stroomen.
Daer leijt een banck een mijle weechs dweers van Oosteynde (ghenaemt oude Moersbanck) ende is met leech water twee vadem diep: ende West ten Noorden van Oosteynde leyt oock een banck ghenaemt de Dijckstal, ende is dry vadem met leech water.
Item als dat Clooster ten Duynen oft de Broers Zuyden van v leyt, soo sijt ghy aen t'binnenste van Broersbanck, ende als Duynkercken z. ten w. van v leyt, soo sijt ghy voor by dat quaetste oft wterste vande bancke, daer leyt een hooghe schorre Duyn recht by westen Nieupoort ende daer recht dweers of beghint Broersbanck, streckende wel vier mijlen van landt n.n.w. in Zee, ende leyt van Nieupoort n.w. Ende als Nieupoort z.o. ten z. van v is, soo sijt ghy de bancken ghepasseert.
Item n.w. ende n.w. ten w. van Duynkercken sijn twee oft dry quade bancken, liggende van landt d'een twee ende d'ander dry groote mylen, ende de middelste is ghenaemt de Polder vanden Dijck, maer d'ander ghenaemt de Ruytingh is seer quaet, om dat hy bykans int vaer water leyt, ende sijn beyde gader met leech water maer twee vademen diep, men moet daer voorsichtich wesen. Daer ligghen noch twee bancken n.w. ten n. van Duynkercken ontrent twee mijlen van landt, ghenaemt de Drystael ende die quade banck, ende sijn niet dieper met leech water dan twee vadem en half. Item by de Custe van Vlaenderen langhes, moecht ghy sonder letsel tusschen t'landt ende de bancken op vijf oft ses vadem doorseylen, maer ten is niet goet voor groote schepen. Ende de stroomen vallen t'meeste deel van ghetije d'weers ouer de bancken, soo wel by ebbe als by vloet.
Noort noortoost van Calis Clif ontrent dry groote mylen, leyt met leech water een banck van dry vadem diep, met noch een ontrent twee mijlen van Greuelinghen, daer oock maer dry vadem waters is.
Item onder d'Oudeman oft Tour de l'Ordre, mach men beschut ligghen voor een Noorde wint, ende tis daer diep seuen oft acht vadem, daer leyt een banck midden inde hoofden van vier vadem, by Suyden ende by Noorden, de selue banck is diep twintich ende tweentwintich vadem: Voor de Somme ist wel twee mijlen in Zee seer vlack water, als te weten vijf ofte ses vadem. Ende die tot Diepen wil wesen, sal vande Oudeman z.z.w. aengaen, soo loopt ghy recht op t' gat van Diepe, ende daer staen baeckens aen de slincker handt als ghy in comt, maer t'moet wel half vloet wesen al eer daer een groot Schip in mach.
Auteursrechtelijk beschermd
