Vande Caronna, Ferol ende Monsia de vermaerste hauenen van Galissie.
DRy mylen z.w. van Ortegal leyt de Hauen van Siguera z.o. innestreckende ende is een goede hauen, de Zuytzijde is eenen schoonen ende leeghen hoeck, de Noortzijde rudtsich ende vuyl, men moetent setten buyten t'Dorp van Siguera. Item vier mylen van daer by westen leyt de Caep de Prior, is eenen wthoeck in Zee streckende. Twee mylen van daer Zuytwaert leyt de hauen van Ferole, op de Noortzijde vande selue hauen ligghen twee oft dry Sandtbaykens, daer van t'Zuyderste t'grootste is, daer staet een huys oft twee op t'selue, ende als ghy t'huys nakende zijt, siet ghy de hauen van Ferole open een weynich Zuydtwaert, ende men looptse midts water inne, ende om den Noorthoeck op wijckende, setment daer op twaelf vadem, want voort Dorp van Ferole ist vlack ende rudtsich, den Zuythoeck van Ferola steeckt verre wt, ende is gheheel vuyl. Van daer naer de Coronna zeyltmen aen z. ende z. ten o. ter tijt toe men een stuck weechs binnen den toren is, die op een ronde holm oft berch staet, so sietmen aen stuyerboort een cleyn Eylant daer een Kercxken op staet, ghenaemt S. Blasius, zeylt daer vry op een Cabels lengte voorby, ende settet voor de stede op ses oft seuen vadem.
Item om vant Eylandt van Cyzarga (by d'onse Cesarien ghenaemt) op de Voort vande Coronne te seylen, salmen wel vijf mylen oost zuydtoost aengaen tot datmen den toren opt westlandt sien mach, ende schouwen aldaer t'landt vier oft vijf Cabels lengte, men mach de Voort wel vier oft vijf mylen recht Zuydoost inne zeylen voor by de Coronna tot Fontaine oft Pitance, ende settent aldaer aen de westzijde onder een reghel Clippen op thien oft twaelf vadem: Item o.n.o. teghens de Coronne ouer leyt Ponte de Mas, daer machment oock setten op thien oft twaelf vadem, daer leyt een reghel Clippen aen de Noortzijde, ende gaet een groote brugghe ouer de Riuiere.
Zuydt zuydtwest ende z. ten w. van Eylant van Cyzarga, leyt d'hauen Queres, ende is schoon om inne te comen, binnen wesende wijctmen westwaerts op een groote half myle, ende setment aldaer op acht oft neghen vadem. Seuen mylen by westen Cyzarga leydt den Oosthoeck van Monsy oft C. de Belem, daermen voorby lancx zeylt z.z.o. ende z.o. ten z. tot binnen Monsy: Item omme by Westen in te seylen moetmen houden Capo de Corian buyten de C. de Conte, twee Schepen lengte tot dat ghy S. Marien Kercke sien moecht buyten den hoeck van Monsy, ende staet opt Westlandt, zeylt alsdan de Voort inne z.o. tot binnen Marie-kercke, ende settet achter de Clippen voort Dorp op acht oft neghen vadem, maer en zeylt Monsy niet in, voor ende al eer ghy de voors. Kercke buyten den hoeck van Monsy sien moecht, men macht aen de noortzijde vande hauen mede setten op vijf, ses oft seuen vadem. By zuyden t'Dorp Monsy is een inwijck daer een droochte voorleyt, streckende o.n.o. wel twee Cabels lengte lancx de hauen.
Onse Vrouwen-kerck ende de Monick ligghen vanden anderen n. ten o. ende vande Cingels o.n.o. Alsmen wter Zee comt, ende de Vrouwen-kerck van v leyt Zuydtoost, soo looptmen by westen de vuylen inne. De vuylen ligghen vanden Monick Zuydtwest ten Zuyden, ende t'innerste eynde vande vuylen leyt vanden voorschreuen Monick z. ten w.
De Capo de Finisterre ende Monte Lauro liggen verscheyden z.o. ende n.w. de vuylen die daer ligghen tusschen de voors. Cape ende Monte Lauro ligghen van malckanderen z.z.o. Tusschen C. de Finisterre ende C. de Coriana is een Bay daerment setten mach by o. de groote Clip, voor een sandtbay op ses oft seuen vadem. Een cleyne mijle by Oosten de Capo de Finisterre, leyt de hauen van Corcouia, die onse Schippers Kruycke Bajoenen noemen, streckt Noortwaerts inne, ende men settent teghens de Santbay op acht oft neghen vadem.
In dese voorschreuen Landen ende Hauenen vallen ghelijcke waren ende Coopmanschappen als aen de voorschreuen Custen van Ribadeo, etc. Ende hebben iaerlijcx op sekere tijden een wonderlijcke teelt van Walvisschen, daer mede sy grooten handel drijuen.
Auteursrechtelijk beschermd
