Spiegel der zeevaert

Diepten ende gronden vande Noortzee, beghinnende vant Voorlandt Enghelandt oft Vlaenderen.

INden rechten Vaerwech vant Voorlant, ende de Vlaemsche bancken ist diep 24. vadem, ende ontrent n.w. ten w. van Schouwen dry mylen leyt een banck ghenaemt de Botbanck, ende is diep vier vadem. Ende buyten de banck int Vaerwater van Zeelandt ist diep 26. vadem. Item Noortwest van Haerlem acht oft neghen mylen inde Zee, begint de Breede Veerthien, ende is een droochte hem streckende lancx de gantsche Custe van Hollandt tottet vlacke van Amelandt, ende eynt aldaer. Is diep tegens Haerlem ende Egmont 13. 14. ende 15. vadem, tis wasich sandt ghemengt met swert sandt ghelijck mostaertsaet. Item dese voorschreuen droochte is diep tusschen Texel ende Vlielandt 15. 16. ende 17. vadem, ende is de gront aldaer groff ende root sandt, ende men is dan ses oft seuen mylen buyten t'slandts, want de banck daer smalder is dan opt Zuydteynde. Item buyten dese banck inden rechten Vaerwech tusschen Zeelandt ende Texel ist diep 26. vadem, tot aen t'witte sandt, by de Visschers ghenaemt Dogghesandt.

Aen de Enghelsche sijde int diepe water teghens Jermuyen ist diep 32. vadem. Teghens Flambergher-hooft ende Scherenburch ist diep 38. vadem: Alwaer t'Dogghersandt oft de witte banck haer beghinsel is nemende, haer streckende dweers door de Noortzee naer Heylighelander-diep. Dit selfste sandt is afkennincx lants van Flamburgherhooft niet dieper dan neghen oft thien vadem. Ende alsmen is op twaelf vadem op t'voorschreuen Dogghersandt, soo leyt Texel van v Zuydtoost dertich mylen oft daer ontrent. Op t'selfste sandt zijnde ontrent op derthien vadem, soo leyt Vlielant van v Zuydtoost en zuyden 24. mylen. Ende op 16. vadem van t'selue landt, sal Vlielandt Zuydt zuydtoost van v ligghen 21. mylen.

Een Schip comende vant Riff, ende beuint op t'voorschreuen Dogghersandt 18. vadem, soo sal Vlielant Zuyden ten oosten van v ligghen twintich mylen, vint ghy t'diep twintich vadem, sal alsdan Vlielandt van v ligghen Zuyden ontrent twintich mylen. Ende ist diep 22. vadem, soo moet hy zeylen nae t'Vlie Zuyden ten westen, ende Zuydt zuydtwest. Waert saecke dat hy quame int Heylighelanderdiep op 24. oft 26. vadem, moet hy alsdan Zuydt-west ende zuydtwest ten zuyden aengaen, ende sal daer mede op der Schellingh veruallen. Heyligelander diep is 27. vadem, ende dan ismen heel om de Oost. Item tusschen t'Riff ende Doggherssandt ist diep int rechte Vaerwater 26. ende 27. vadem. Ende om de West buyten t'Vaerwater ist diep 32. vadem. Een Schip comende wt de hoofden oft Zeelandt vint hijt op t'Riff diep 24. vadem, sal alsdan der Neuse in Norweghen van hem legghen noorden ten oosten ontrent 18 mylen: comende op t'Riff op twintich vadem, leyt ter Neuse van hem Noortwaerts 16. mylen. Item vindt hy t'Riff op 18. vadem sal der Neus van hem ligghen Noorden ten westen 18. mylen. Ende de course is van daer nae de Holmen Noordtoost twaelf mylen. Ende voorts nae de Schaghen Noordtoost ten oosten 18. mylen. Ontrent Noordtoost ende noordtoost ten oosten vande Holmen, twee mylen van t'lant leyt een Clippe daert niet dieper en is dan een groote vadem waters.