Spiegel der zeevaert

[p. 36]

Diepten ende gronden vande Noortzee.

Diepten ende gronden ontrent Jutlandt ende Amelandt.

DAer leyt een banck buyten Jutlandt van Dodenbarch een mijl inde Zee, ghenaemt den Reefhoren, streckende noordtwest ten noorden wel acht mylen lanck, is tot sommighe plaetsen niet dieper dan dry vadem, daermen tot sommighe plaetsen door zeylen ende rede maken mach voor eenen noordtwesten ende noorden wint. Item op twintich vadem van Amelandt t'Zeewaerts hebt ghy grof, roodt ende swert sandt ghemenght met schulpen. Van daer Zuydtwaerts zeylende op xvj. vadem dry vren lanck, dat is t'rechte Vlack van Amelandt, ende de gront is al cleyn sandt ghemengt met schelpen. Item op xxiiij. vadem by Noorden vander Schellinck, daer ist al cleyn wit sandt, ende van daer op xviij. vadem ist wit ende swert sant onder den anderen ghemengt.

Op t'Vlielandt hebt ghy wit sant met roode schelpen, ende daer onder cleyn root sant. Op xvj. vadem vant westeynde van Vlielandt hebt ghy groff root sant met swert sant als Mostaertsaet daer onder. Ende desen gront leyt buyten t'lant ses oft seuen mylen. Ende opt Oosteynde vander Schellinck t'Zeewaerts op xviij. vadem ist cleyn wit sant met swert ghemengt, daer mede onder sijn cleyn witte dincxkens als naelden. Als ghy comt teghens Borckom op de wester Eems op xvij. oft xviij. vadem, soo moecht ghy t'lant sien, de gront is grof steenich ende cinghelich sandt. Amelandt machmen sien op xiiij. vadem, ende der Schellinck op xvj. vadem: Vlielant op xv. oft xvj. vadem. Daer mach een yeder sijn rekeninghe by nachte op maken. Aen die Noorderhaecke vant Texel op xvj. vadem machmen t'landt sien, Hollant machmen sien op xiiij. ende xv. vadem alsmen is binnen de Breede xiiij. welcke droochte sijn beginsel is nemende Noordtwest van Haerlem, hem streckende lancx die gantsche Cust van Hollandt tottet westeynde van Vlielandt, is buyten t'slants ligghende vij. oft acht mylen.

Diepten ende gronden van Juthlant ontrent Schaghen.

Een groote myle van Schaghen o. ten n. ist diep 35. vadem: Noordt noordtoost vanden hoeck van Schaghen een groote myle, ist diep 38. vadem. Als Schaghen noordtwest van v leyt, daer ist diep 17. vadems. Tusschen Schaghen ende Lesu ist diep 20. vadems, ende is weecke gront als Waese. Tusschen Anhout ende Waesberghen midden int Canael ist diep 22. vadem. Tusschen Lesu ende Anhout ist al harde gront ende steenachtich. Neffens Waesberghen leyt een droochte van 17. vadems. Tusschen Anhout ende Col leyt een droochte van seuen vadems, ende die stroom rauelt en drayet daer somtijts ouer.

Diepten ende gronden vande Ooster-Zee.

TUsschen Oelant ende Gothlant ist oneffen diepte, somtijts 20. vadems, ende somtijts 23. vadems. Die gront is swert gruys steenachtich, soo groot als erweten. Als t'Zuyteynde van Oelant west van v leyt twee mylen, daer ist diep 27. vadems steck gront. Als Capelle op Zuyder noorden w.n.w. van v leyt, daer ist diep ontrent 31. vadems, ende is steck gront. Teghen die clippe int Vaerwater ist diep 35. vadems, steck slijckich grondt. Tusschen groote ende cleyne Kaerle ist diep 14. vadems, ende is goede rede onder. Tusschen Houburch ende de Oostergaerde leyt een banck van 24. vadems, ende is grof root sant, ende ghy en moecht Gothlant wt die Meersse niet wel sien. Daer by oosten leyt mede een banck van 36. vadems, daer ouer sijnde en hebt ghy gheenen gront op 40. vadems. Als Rysche-hooft z.o. van v is dry mylen, daer ist diep 30. vadems. Alst z.z.o. van v is een half myle, daer ist 15. vadems diep, ende is wit sandt. Rysche-hooft een cleyn myle ontrent west van v, daer ist diep 16. vadems. Teghen Heel en half myle van landt, daer ist diep ontrent 32. vadems. Te Heel op die Reede ist diep 25. vadems. Tusschen Muen ende Falsterboen ist diep 14. vadems. Tusschen Steden ende Falsterboen in die Canael, ist diep 12. vadems. Neffens Falsterboen ist vlack, ende aen Steden ist diep 13. vadems. Tusschen Draeckerrif ende Southolme is t'droochste vijf vadems min een elle. Voorst na die Sondt toe ist altemet dieper 6. 7. 8. 9. ende 10. vadem.