Spiegel der zeevaert

[p. 34]

Beschryvinghe vande gronden ende diepten beneffens diuersche provincien onser nauigatie.

Eerst van Gascoigne, Poittou ende Britaigne.

BUyten de Riuiere van Bordeaux oft Kennincxlandt ist diep 40. vadem. Ende int ghesichte vanden toren van Cordam ist 30. vadem diep.

Teghens de Custe vant landt van Poictou 16. mylen buyten Olone ist diep 25. vadem: ende t'landt van Poictou ghenakende op acht mylen, salt diep wesen 35. vadem. Ende inden vaerwech tusschen Porthuys ende Heys ist diep 30. vadem: inde vaerwech van Heys insghelijcx 30. vadem: tusschen Heys ende Belysle mede 30. vadem Ende buyten de vaerwech ist diep 35 vadem. Binnen t'vaerwater zijnde vintment diep 25. vadem. Twee kenninghen buyten Heys, werpt ghy 45. vadem.

Tweeentwintich mylen Zuydtwaerts van Belysle ist diep 70. vadem. Ende vant Noordtwest eynde van t'selfde Eylandt Zuydtwest neghen mylen ist diep 60. vadem. Ende te midtslande van Belysle op 40. vadem salmen landt sien. Inde vaerwech tusschen Belysle west ten noorden aengaet, ende comt teghens Gloylandt, salt diep vinden 60. vadem. Buyten ende binnen de Rudtse die van Gloylandt t'Zeewaerts leyt ist diep 40. vadem. Op 65. vadem buyten de Wester Penmarque, salmen met een west noordt-westen ganck buyten de Zeemse zeylen, ende comt niet nader by nachte dan 55. vadem. Ende de gront is grof root sant, ghemengt met ronde steenkens. West zuydtwest anderhalf myle van de Zeemse leyt een reghel van rudtsen, ende is daer op diep seuen vadem: ende tusschen de Zeems ende rudtsen ist diep 50. vadem.

Tusschen de Zeems ende Heyssant int vaerwater ist diep 55 vadem, de grondt is grof root sandt ghemenght met ronde steenkens root ende swert. Dicht by Heyssant ist diep 45 vadem, ende daer binnen ist oneffen daermen qualijck diepen can. Ontrent Zuydtwest van Heyssant ses mylen ist diep 70. vadem, de gront is cleyn wit sandt onder ghemengt met witte schelpkens, ende lange witte dincxkens in maniere van naelden, so leyt Heyssant Oostwaerts van v. Daer vindt ghy wit sandt met groote witte schelpen daer onder ghemengt, dan leyt Heyssant Zuydtoost van v. Ende ist dat ghy dese voorschreuen gronden niet versekert en sijt, soo gaet Noortwaerts aen, vindt ghijt dan dieper soo zijt ghy tot Zeemswaert, ende vint ghijt droogher, zijt dan inde Canael ontrent Noorden van Heyssant.

Item tusschen Heyssant ende Obreueracq inde traue oft vaerwech ist diep 60. vadem. Tusschen Heyssant ende de Sorlinghes midden inde Canael ist diep 70. vadem. Sijt ghy tusschen de Zeems ende Heyssant op 70. vadem, sal aldan de gront wesen cleyn swerte saechte steenkens ende gheel aerde. Ende beuint ghy root grof sandt, soo gaet Noordtwaerts tot dat ghy vint wit sandt ghemengt met langhe dincxkens, dan sijt ghy sekerlijck inde Entringhe vande Canael.

Een Schip comende van Cizarga oft Cesarien (soo ons volck dat noemen) ouer de Spaensche Zee met een noort noordtooste ganghe nae Heyssant, ende beuindet diep 80. vadem, soo is hy buyten Heyssant 14. oft 15. mijlen, ende verder innezeylende sal hijt diep vinden 70. vadem, sal dan wesen van Heyssant thien mijlen, ende beuint ghy de gront gheele cleyne schulpkens, waesen met cleyne swerte steenkens, soo zijt ghy ter Zeemswaert, ende moet alsdan Noordtwaerts gaen met de vloet om Heyssant te schouwen, tot dat ghy crijcht wit sandt, ende de langhe dincxkens als naelden, want dat zijn gronden vanden Entringhe vande Canael.

Tusschen Heyssant ende Lisle de bas op 40. vadem, sult ghy wesen vanden lande vier mylen, ende comt by nachte niet nader dan 45. vadem. Twee mylen buyten Obeuracq vindt ghijt diep 55. vadem: ende acht mylen buyten de seuen Eylanden ist diep vijftich vadem.

Item een myle buyten de Clippen van Obeurack leyt een rudtse onder t'water, ist dat ghy laueren moet tusschen die Fourns ende Obeurack, soo comt de voors. rudtse niet naerder dan veertich vadem, West zuydtwest ende Zuydtwest vande seuen Eylanden, comt den lande niet naerder dan op veertich vadem, maer daer by westen moecht ghijt comen op 30. oft 25. vadem.

Item een Schip wesende west zuydtwest ende zuydtwest ten westen van de Sorlinghes op 80. vadem, ende bevindt (door t'ghebruyck vanden Graetboghe oft Astrolabie) hem te wesen 15. minuten by Noorden de 49. graden, die is buytens landts 26. mylen, ende moet aengaen oost ten oorden tot dat hijt diep vint 66. vadem. Soo is hy sekerlijck tusschen de Sorlinghes ende Heyssant in de Canael, moet alsdan noortlijcker aengaen om Enghelant aen te zeylen, ende tis tusschen Enghelants eynde en de Lysaert diep 55. vadem.