T'Boeck van Ons Lieve Vrouwe van Maestricht, ende van den oorspronck des stadts, ende miraculeuse beeldt van Ons Lieve Vrouwe, rustende int convent der minderbroederen

Het XLI. Capittel.
Van een kint dat van een onnaturelijcke gesteltenisse der armen ende der voeten door ghelofte sijns moeders totte H. maghet Mariam, naturelijcke ghesteltenisse der handen ende der voeten vercreech.

SEbastianus Roosen ende Geertruyt vanden Berghe wettelijcke gehouden ende borghers binnen Maestricht,

[p. 234]

hebben ter werelt ghebrocht int iaer ons Heeren 1580. eenen sone, den welcken sy oock naer den vader Sebastiaen hebben ghenoemt, welcke kint door de cranckheyt des moeders bestaett is by een voester, al waer tusschen den tijt van acht oft neghen maenden dat het van sijn moeder was seer misvallich is gheworden, alsoo dat die armkens met die handekens teghen natuerelijcke ghesteltenisse buyten om wasten, dat het kindeken de handekens aen den mont niet en conde bringen, den buyck was bouen maeten gheswollen ende dick gheworden, ende de voetkens waeren contrarie binnen crom inghewassen. De moeder nv berooft van haeren man, naer liefde die sy was draghende tot haer eenich soonken, heeft ghesocht alle middelen om tskints ghesontheyt te vercrijghen: Maer als sy veel remedien te vergheefs hadde versocht den tijt van vier iaeren dat soo miserabelijck ghestelt was, is sy vermaent van Godtvruchtighe persoonen haeren toevlucht te nemen totte hemelsche Coninginne Mariam, soo beloefden sy haer soonken te verwillighen, in dien het Godt beliefde ghesontheyt te verleenen, dattet alle die daghen sijns leuens tot teecken van danckbaerheyt soude ommeghaen die vermaerde Processie van ons Lieue Vrouwe ter

[p. 235]

Minderbroederen, die iaerelijckx gehouden wordt t'sanderdaechs naer Paesschen, ghecleet alleen wesende int lijnen, met een bernende keersse inde hant. Naer welcke beloftenisse het kint alleynskens ghesont en wel dispoost is gheworden, sonder te houden iet van tvoorghaende ghebreck, ghelijckt nv blijckt sijnde een fray volwassen man, noch binnen Maestricht woonende. Aldus verclaert door den seluen persoon int by wesen der ghetuyghen daer toe versocht ende gheroepen weerdich van ghelooue, meester Frans Dolmans, ende meester Andries van Eyck, Ende voor my Jan Roels als openbaer Notaris by den Raden van Brabant gheadmitteert, op datum den 20. Decembris, 1611. Quod attestor,

I. Roels.

Ende ick Sebastiaen Roesen, tot meerder certificatie ende getuychenisse des voorschreuen ghenoten beneficie van ons Lieue Vrouwe hebbe dit met mijn eyghen hant onderteeckent. Quod attestor,

Sebast. Roesen.