T'Boeck van Ons Lieve Vrouwe van Maestricht, ende van den oorspronck des stadts, ende miraculeuse beeldt van Ons Lieve Vrouwe, rustende int convent der minderbroederen

[p. 228]

Het XL. Capittel.
Van een kint aen welcke drij miraeckelen gheschiet sijn in drij verscheyden sieckten door ghelofte tot ons Lieue Vrouwe van Maestricht.

⁺WIllem vanden Poel ende Margriet vanden Vels borgheren binnen Maestricht hadden eenen sone Cornelis ghenoemt die gheboren is int iaer 1588. den xxviij. Februarij die int selfde iaer een accident van een sware ghescheurtheyt heeft ghecreghen, welcke ghescheurtheyt sy met medecijnen niet en hebben cunnen cureren. Een onbekende vrouwe gaf de bedroefde ouders raet dat sy het kint sommighe vrijdaghen souden draghen inde Kerck vande Minderbroederen binnen Maestricht met brandende licht voor het Beeldt van ons Lieue Vrouwe segghende, dat sy hier door voor haer kinderen hulp hadde vercregen. Als die ouders dit twee oft drij reysen op vrijdaghen ghedaen hadde, door een deuote vrouwe Mayke genoemt, huys-vrou vande Bode op Mechelen, soo hebben sy tkints bant los ghemaeckt om te sien hoe dat met hem waer, doen hebben sy tkint vande voorschr. gescheurtheyt verlost ghevonden. Die ouders danckende Godt ende sijn H. Moeder ende maghet Maria. Ende die suster vanden voorschr. Willem,

+ Int Iaer 1588.

[p. 229]

ghenoemt Mechtelt vanden Poel, nv out sijnde ontrint lxiiij. iaeren, heeft het kint t'smaendaechs nae Paesschen inde Processie ommeghedraghen, ende den bant in ons Lieue Vrouwe Capelle gehanghen. Desen voorschr. Cornelis sone vanden voorschr. Willem, noch leuende, out nv sijnde ontrint xxiiij. iaeren, Capellaen wesende der Collegiale Kercke van ons Lieue Vrouwe binnen deser Stadt, heeft voor my beleden dat hy tot noch toe vande voorschreuen gescheurtheyt het minste letsel oft ghebreeck noyt gehadt en heeft soo hy dat inde brieuen by den Notaris gepasseert met sijn eyghen hant ghetuyght, welcke brieuen by my bewaert worden.

2. Den seluen sone als hy drij oft vier iaeren out was heeft gehadt een swaer ende langhe terende oft drooghende sieckte, soo wtgemergelt dat sijnen hals het hooft niet draghen en coste, dat hy twee oft drij weken met een veder gelaeft moeste worden, ende hoe wel dat hy te Luyck worde ghedraghen voor het Beeldt vanden H. Bonifacius, ende gheen ghesontheyt oft beternisse aldaer hadde ghecreghen, soo ginck die vader Willem vanden Poel tot sijnen Bichtvader den E. P. Nicolaes Val der Societeyt Jesus deser Stadt, die welcke hem vertroostende seyde, Laet ons ghaen tot die Kercke vande Minderbroeders,

[p. 230]

ick sal daer gaen Misse lesen op den Autaer van ons Lieue Vrouwe ende bidden Godt almachtich ende sijn Heylighe moeder voor v kint, ende offert uwen sone als dan die H. Moeder Godts Maria, seggende, In dien mijnen sone door v intercessie oft begheerten aen uwen beminden sone Godt almachtich ghesontheyt vercrijght, soo sal ick tot een danckbaerheyt hem houden totter studien, ende mijn beste doen om hem te bringhen totten gheestelijcken staet. Dit aldus gedaen sijnde, is den voorschr. sone Cornelis binnen twee oft drij dagen soo merckelijck verandert, dat hy binnen corten tijt geheel gesont is geworden.

⁺3. Den seluen Cornelis sone van Willem vanden Poel als hy out was ontrint neghen iaeren, heeft gehadt een wonderlijcke ende seer vreesselijcke vallende sieckte met afgrijsselijcke stemme, van welcke sieckte hy naederhant soo dickwils ouervallen is gheweest, dat hy plat te bedden gehouden worde, want hem de sieckte van smorgens ontrent ten vier uren, tot tsauonts acht oft neghen uren, ontrint twintich oft dertich diuersche reysen soo vreesselijck ouerquam, datter twee oft drij persoonen ghenoech te doen hadden om hem te houden, al oft hy beseten hadde gheweest, ende gheen medecijne hulpende, soo dat ghetuyght Antonette de Labourse weduwe

+ Int Iaer 1597.

[p. 231]

wt den mont van haeren man saeligher memorie Doctor Franciscus Winne, soo hebben die ouders, ghedachtich sijnde der voorgaende ghenoten weldaden van ons Lieue Vrouwe, wederom haeren toevlucht ghenomen totter selue ons Lieue Vrouwe. Ende die sone heeft door raet van sijnen Bichtvader P. Michiel, een van die Paters der Societeyt Jesus, een ghelofte ghedaen aen ons Lieue Vrouwe, soo verre hy van die voorschr. miserie mochte verlost worden, dat hy soo langhe als hy soude leuen in ghesontheyt, alle iaeren t'smaendaechs naer Paesschen de Processie in eenen sack soude omgaen. Ende sijn moeyken daer hy by woonden gheloefde oock voor de gesontheyt des kints seuen iaeren lanck int lijnen ende berrevoets de selfde Processie omme te ghaen. Ende eenighe Missen, ende aelmissen tot twee reysen gedaen hebbende aen de Minderbroeders, soo heeft die voorschr. sieckte den sone verlaeten, ende hy heeft sommighe vrijdaghen in die voorschreuen Kercke een keersse gheoffert voor het Beeldt vande Moeder Godts, ende sijn ghebedt aldaer ghedaen. Die voorschr. sone Heer Cornelis Capellaen van ons Lieue Vrouwe Kercke teghenwoordich ghetuyght dat hy tsinder noyt de voorschr. sieckte meer gehadt en heeft, comt noch wt danckbaerheyt dage-

[p. 232]

lijckx ons Lieue Vrouwe besoecken, ende selue de Missen dienen met deuotie. Dat de voorschreuen sone van Willem met dese sieckte ghequelt is gheweest, ghetuyghen bouen den vader, noch alhier den E. P. Supprior vande Predickheeren F. Vincentius Georgij, ende Joffrou Anthonette de Labourse, weduwe wijle Doctor Franciscus Winne, der welckens hantgeschrift ick by my bewaere met het gheschrift ghemaeckt by publicke Notaris, in forme hier nae volghende.

Op huyden den seuenthienden dach deser tegenwoordigher maents Decembris, Anno duysent ses hondert ende elf, voor my openbaer ghesworen Notaris, ende den gheloofweerdighen ghetuyghe hier onder ghenoemt, sijn in proprien persoonen ghecompareert den Eersame Willem vanden Poel, ende met hem sijne suster Mechtelt out ontrint lxiiij. iaeren, ende den voorschr. Willem ontrint tsestich iaeren, ende oock met hun Heer Cornelis vanden Poel den sone vanden voorschr. Willem out ontrint xxiiij. iaeren, die welcke ter eeren Godts, ende sijnder ghebenedijder moeder Marie hebben expresselijck gestanden ende bekent, gelijck sy gestaen ende bekennen mits dese tsamenderhant allen die voorgheroerde punckten ghelijck die int langhe hier voor verhaelt sijn, alsoo aen de persoon vanden

[p. 233]

voorschr. Heeren Cornelis, in sijne ionckheyt alsoo geschiet ende ghepasseert te sijn. D'welck sy Attestanten verclaeren niet te bekennen door eenige vreese, seductie, persuasie oft andere sinistre redenen oft oorsaecken, dan alleen tot pure eere, loff, ende dancksegginghe aen Godt almachtich, ende sijnder ghebenedijder lieuer moeder Marie om voorder te moghen verbreyt ende veropenbaert te worden. Super quibus, &c. Aldus gedaen ende ghepasseert binnen den woonhuys van my Notaris genoemt den Tuymelaer, ghestaen in S. Joris straet binnen Maestricht, in presentie vanden Eersamen Matthijs Oliesleghers ende Framborch vander Waerden als ghetuyghen weerdich van gheloouen, hier toe gheroepen bysonder ende ghebeden.

Ende van my Matthijs Hermans als openbaer gesworen Notaris byde Eerw. Rade in Brabant gheadmitteert, hier toe versocht sijnde.