T'Boeck van Ons Lieve Vrouwe van Maestricht, ende van den oorspronck des stadts, ende miraculeuse beeldt van Ons Lieve Vrouwe, rustende int convent der minderbroederen

Het XXXIX. Capittel.
Van twee Minderbroederen, genesen door gheloften tot ons Lieue Vrouvve van Maestricht.

DIe H. Schrifture seyt, dat wy niet ⁺ rechtelijck en doen ist dat wy swijghen ende niet en bootschappen die ⁺ won-

+ Int Iaer 1611.

+ 4. Reg. 7.

[p. 224]

dere wercken Godts, iae dat wy van een groot misdaet beticht sullen worden, Soo en heb ick niet cunnen ghelaeten te verhaelen wat my door die verdiensten vande H. Moeder Godts Maria gheschiet is. Als ick onderschreuen van Tshertoghenbosch met obedientie reysden int couste vanden winter int iaer duysent ses-hondert ende elf, inde maent van Januarius, recht voor S. Jan Guldemonts dach, soo is my een caterne ghevallen van binnen inden mont bouen die tanden, ende heeft ghemaeckt een gheswel van binnen ende van buyten den mont, ende causseerden my groote pijnen, alsoo dat ick niet en cost eten, noch van pijnen slapen. Te Diest ghecomen sijnde, ben ick ghegaen met den Eerw. P. Guardiaen aldaer ten huyse van eenen Chirurgijn om dat gheswel open te doen vliemen, op dat die materie soude moghen wtloopen ende die pijne verminderen: Maer alsoo de Chirurgijn dat niet en derfde bestaen, mits dat ick daer niet en bleef, ende sorghde voor meerder swaericheyt op den wech door die coude, gaf my anderen raet die my niet en hilp. Ick dan sijnde buyten die poorten van Diest gestelt op den wech nae Hasselt, heb ick my gerecommandeert aen ons Lieue Vrouwe van Maestricht, tot welcke plaetse ick door ghehoorsaemheyt gesonden worde om aldaer het officie

[p. 225]

van Guardiaen te bedienen. Ende een cleyn deuotie voor my ghenomen hebbende te doen ter eeren van ons Lieue Vrouwe als ick daer ghecomen soude sijn, soo heb ick daernae van pijne my opden waghen totter ruste ghegeuen, ende wacker wordende vande sluymeringe ontrint Hasselt gevoelden ick alle de pijne met het gheswel van buyten ende van binnen gantsch vergaen te sijn. Dit hebben ghesien Sig. Pieter van Tulden, ende B. Jan schaep die my beyde vanden Bosch verselschapten tot Maestricht. Soo dat ick belijde ende bekenne met dese dat ick op dat pas ghenas nae die voorghenome deuotie ter eeren van ons Lieue Vrouwe, soo ick tsanderdaechs oock vertelde voor beyde de Heeren Borghmeesters, Cauwenberch ende Geraert Dries, die my quamen saluweren. Ick segghe de waerheyt in Christo, ick en lieghe ⁺ niet, in dit miraeckel, maer onderteecken dit voor warachtich te sijn. Int Conuent der Minderbroederen binnen Maestricht, den 14. Decemb. 1611.

Br. Corn. Tielmans, Guardiaen van Maestricht.

2. Dit ander miraeckel verhael ick wt het ⁺ eygen schrijuen van mijnen P. Vicarius, het welcke dit teghenwoordich iaer aen hem gheschiet is, soo ick met het gheheel Conuent ghesien hebbe ende cunnen ghe-

+ Rom. 9.

+ Int Iaer 1611.

[p. 226]

tuyghen. Als ick int iaer ons Heeren duysent ses hondert ende elf inde maent van Meert bevanghen was met een swaere sieckte, diemen ghemeynelijck noemt die brant-sieckte, ende daer van ontrint 14. daghen plat te bedde hadde gheleghen, alsoo dat ick ende veel andere anders niet en meynde dan datter ick af soude steruen, soo heb ick my ghekeert met een vast betrouwen tot Mariam die Moeder Godts, om door haer verdienste te vercrijgen verlenginghe van mijn leuen waert my saelich: Ende alsoo ick dickwils hadde hooren segghen van die deuote Processie van ons Lieue Vrouwe in onse Kercke te Paeschmaendach, wanneer dattet Beeldt solemnelijck omghedraghen wordt, ende vele menschen door gheloften geholpen worden, soo heb ick met consent vanden Pater Guardiaen oock deuotie gehadt tot mijn Patronersse Mariam om haer een cleyn ghelofte te doen, oft sy mischien die wilde ontfanghen, dat ick op Paeschmaendach des snachs nae de mettenen soude den wech van ons Lieue Vrouwe Processie drijmael omgaen, ende lesen elcke reyse een roosenhoeyke, maer op den seluen dach, noch oock tsanderdaechs gheen beternisse voelende, hebbe my ghegeuen totter biechte, begherende oock op den 25. Meert op den dach van ons Lieue Vrouwe Bootschap

[p. 227]

het H. Sacrament des Autaers te ontfanghen om my beter ghereet te maeken totter doot. Ende siet wat wonders op den dach van ons Lieue Vrouwe Bootschap, als ick meynde int sieckcamer het H. Sacrament des Autaers t'ontfanghen, soo ben ick onuersins met verwonderinghe van een ieghelijck ghesont gheworden ontrent den seuen uren, alsoo dat ick noch op den seluen dach Misse hebbe gelesen, Ende staende aen den Autaer docht my dat ick ghevoelde, al oft my iemant drijmael hadde ghedout, alsoo dat ick veel stercker ben vanden Autaer ghegaen, dan icker aenghecomen was, ende stercker geworden ben dan ick voren was eer ick sieck worde, soo het bleeck inde goede weeck int bicht te hooren ende preken, sonder te ghevoelen eenige weeckelijckheyt vande voorgaende sieckte, Gode sy loff, ende sijn ghebenedijde Moeder ende maeghet Marie, soo dat ick vrijelijck mach segghen met S. Paulus, Godt ende den Vader ons Heeren Iesu ⁺ dat ick niet en lieghe. Oirconde deser, &c. int Conuent der Minderbroederen, A.^o 1611.

Br. Ian Hvebrechts Vicarius van het voorschreuen Conuent, gheboren van Antwerpen.

+ 2. Cor. 11.