T'Boeck van Ons Lieve Vrouwe van Maestricht, ende van den oorspronck des stadts, ende miraculeuse beeldt van Ons Lieve Vrouwe, rustende int convent der minderbroederen

Het XXXVIII. Capittel.
Van een blinde vrouwe woonende te Alckmaer in Hollant die siende is geworden.

DIt tegenwoordich miraekel verhael ick wt de brieuen vanden Secretaris Verheyen inde presentie vande Schepenen hier volghende ghepasseert.

Wy Tossain Wathier, Ghielis Ruysschen, ⁺ Nicolaes Cazen, D. Matthijs Thysius Licentiaet, Andries Vaes, ende Michiel Coecken Schepenen, van beyde onse ghenaedichste Heeren Princen binnen de Stadt van Maestricht, thuyghen, certificeren, ende ghestaen mits dese onse opene brieuen van attestatie dat op huyden dato onderschreuen, als nemelijck den sesten dach deser maent van April duysent

+ Int Iaer 1610.

[p. 218]

ses hondert thien op den dinghuyse deser Stadt voor ons als Schepenen bouen ghenoemt ende oock in presentie van Pater Franciscus Strijp Guardiaen vande Minderbroederen met sijnen medebroeder P. Gummarus vander Eycken, lijffelijck erschenen ende gecompareert is, eene vrouwe persoone ghenoemt Anna Janssen gheboren van Eupen ghelijck sy verclaerden, aldaer haer vader noch woonende ghenoemt Theunis Lenssen, gheboren van Stockhem by Eupen voorschr. ende haer moeder saeligher genoemt gheweest Marie, ende nv woonende by Anna tot Alckmaer in Hollandt, sittende aldaer in eestoele met Jan Taet haeren man van sijn hant-werck wesende wulleweuere, segghende haer out te sijn viertich iaeren oft daer ontrint, aldaer tot Alckmaer tsamen woonende inde straete ghenoemt de Coninckx weghe, op drij huysen naer by de drij papegayen, die welcke Anna voor eenighe daghen alhier tot Maestricht met haer dochtere Marie out ontrint achtien iaeren beyde te voete gecomen sijnde, heeft opentlijck voor de rechte waerheyt betuygt ende verclaert dat sy tot Alckmaer voorschreuen ouer ses maenden is ghevallen gheweest in een swaere crenckte van besicktheyt ende beslach, daer van sy seyt geraeckt gheweest te sijne in beyde haere oo-

[p. 219]

ghen ende ghesichte, alsoo dat haer oochschelen oft plympen op den appel vast toe ghetrocken ende ghesloten waeren, daer door dat sy teelemael starblint was gheworden, ende niet met allen en conste ghesien, haer by blijuende alsulcken starblindicheyt den voorschreuen tijt lanck van ses maenden, waer door sy met groote benautheyt bevanghen sijnde, is onsteken tot deuotie met seer groote begheerten, om haer bevaert te doen tot binnen deser Stadt van Maestricht, om alhier ons Lieue Vrouwe te besoecken, ende alsoo haer ghebeden te storten, ter intentie dat door intercessie van onse Lieue Vrouwe Godt almachtich haere ghesichte wederom verleenen ende vergunnen wilde. Soo eest dat sy Anna in sulcker goede meyninghe van Alckmaer voorschreuen vertrocken wesende met haer voorschreuen dochtere Marie, die haer ouerwech heeft moeten leyden, ouermidts haere blintheyt, is alhier tot Maestricht alsoo blint sijnde ghearriueert ende ghecomen te loigeren in een huys dat ketelken staende te Wijck bijde Veels, in welcke ketelken is woonende Lemmen Rouckaerts, wyens huysvrou genoemt Aleyt heeft die voorschreuen Anna Janssen gansch blindt sijnde als voor, geleyt ende gheconvoyeert opten vijfden dach deser maent Aprilis tot inde Minderbroederen Kercke voor het

[p. 220]

Beeldt van ons Lieue Vrouwe aldaer, dat sy op haer knyen sittende heeft haer ghebedt ghestort, ende haer deuotie gehouden onder de Misse, die welcke op den Autaer van ons Lieue Vrouwe voorschr. P. Franc. van Strijp was celebrerende, doen ter tijt Guardiaen, ende dat onder haer deuotie: Ende durende de selue, door die almoghentheyt Godts, haere ooghen sijn allenskens open ghegaen, ghevuelende ende haer bedunckende, datter schellen oft liesen van haere ooghen worden afghedaen. Inder vueghen dat sy attesteert met volcomen claren ghesichte wtter voorschreuen Minderbroederen Kercke ghegaen te sijn. Ende dat alleen tselue alsoo waerachtich gheschiet ende ghepasseert is. Heeft daer voor lieffelijck met opghestreckten vingheren aen Godt, ende alle sijne Heylighen den eedt ghedaen, ghelijck oock daer op den eedt ghepresteert heeft haere dochter Marie. Aldaer dat oock ghecompareert is Aleydt die huys-vrou van Lemmen Rouckaerts bouen ghenoemt out achten-veertich iaeren, die welcke insghelijckx by solemnele eede heeft ghesworen, als dat die voorschr. Anna Janssen blint was doen sy by haer van buyten in haer huys is ghecomen, ende alsoo oock haer gheleydt met Marie de dochtere der voorschr. Anna nae der Minderbroederen Kercke, ende dat sy

[p. 221]

met volcomen ghesichte is wtter Kercke nae de ghedaende deuotie ghescheyden.

Item Marie Stoetwagens huys-vrou van Jan Gheel out by de vijftich iaeren, wesende naeste naebuerse vande voorschr. Aleydt heeft oock lieffelijck aen Godt ende alle sijne Heylighen ghesworen dat sy die voorschreuen Anna Janssen, als sy by Aleytken int ketelke quam logeren, gesien heeft met blinde ooghen gheweest te sijn, ende haer naederhant wtter Kercke vande voorschr. Minderbroederen gecomen sijnde met open claeren ooghen te wesen. In oirconde ende meerdere ghetuychenisse der waerheyt hebben wy Schepenen van beyde onse Ghen. Heeren Princen bouen ghenoemt dese met onse propre seghelen hier onder wthanghende beuesticht. Gegeuen ende aldus ghepasseert tot Maestricht voorschr. ses daghen inde maent van April, int iaer ons Heeren duysent ses-hondert ende thien.

Gheschreuen wtten Originael, en daer tegen gheconfirmeert is metten seluen ouer al accorderende, door my onderschreuen Secretaris vanden Brabantschen Hoogengherichte tot Maestricht.

Verheyen.

2. Tot meerder beuestighen van dit voorschreuen miraeckel hanghe ick hier by Authentijcke copye door den voorschr. Secretaris ghecopyeert wt de brieuen vande

[p. 222]

hooftbanck van Balen in forme hiernaer volghende.

Wy Drossaert ende tsamentlijcke Schepenen der hooftbanck van Balen inde landen ende hertochdomme van Limborgh geleghen, doen conde, certificeren ende bekennen mits desen, als dat op huyden den seuenentwintichsten April in eyghen propre persoone voor ons compareert ende verschenen is die deughtsame Anna Janssen Theunis dochter van Stockhem, huys-vrou van Jan Taetten van Eupen onsers Rechten ingheboren teghenwoordelijck residerende binnen de stadt Alckmaer in Hollant, ende heeft van ons versocht contschap der waerheyt voor ons verhoort te hebben van sekeren miserabilen staet, daer inne sy de tijden van ses oft acht maenden blint ende stom ghelegen heeft: Ende hoe Godt almachtich haer door een groot miraekel binnen den Minderbroeders Kerck tot Maestricht, door vast betrouwen tot Godt ende sijnder ghebenedijder moeder verlost heeft. Waerop wy Drossaert ende Schepenen voor ons hebben laeten bescheyden Thijs Vercken van Eupen, ende Gijsken Berners van Eupen, die selue bescheyden zijnde, geeedt ende gheexamineert als naer recht, tuygen ende verclaren midts desen, dat sy die voorsch. Anna binnen Alckmaer blint ende in sulcken staet hebben

[p. 223]

ghesien, liggende in haer huys. Seyt den voorghenoemde Thijs Vercken voorder, dat hy als de voorsch. Anna haer preparament totten pelgrimagieganck gemaect hadde, hy met haer naer huys ghecomen is, ende ondertusschen wegen die selue heeft helpen met een stocxken voor blint leyden, ontrint drij oft vier mijlen wechs naer by Maestricht, naemelijck aen de Smeermaeze. Desen tot waeren verkunt, hebben wy Drossaert ende Schepenen onsen gemeynen Schependoms zeghel hier onder doen appliceren, ende door Jan Clocker onsen medestoelbroeder subsigneren. Ghegeuen tot Balen den 27. Aprilis 1610. Was onderteekent, Clocker van Bael, daer beneffens was eenen zeghel opgedruckt in gruenen wasse daer op gheplackt wit pappier.

Dese copye gheschreuen wtten Originael, is die selue metten voorschr. Originael ouer al accorderende beuonden door my Secretaris vanden Brabantschen Hooghengherichte onderghes.

Verheyen.