T'Boeck van Ons Lieve Vrouwe van Maestricht, ende van den oorspronck des stadts, ende miraculeuse beeldt van Ons Lieve Vrouwe, rustende int convent der minderbroederen

Het XXXVII. Capittel.
Van een creupel dochter te Meerssen die gesontheyt van haer beenen vercreech.

TOt noch toe hebben wy verhaelt die miraeckelen gheschreuen int Latijn door den Eerw. P. Sedulius, nv verhaelen wy miraeckelen die naederhant gheschiet sijn, ende die ons ter handen ghecomen sijn by Secretaris ende Notarissen onderteekent in presentie van getuyghen, daer toe versocht, wt hun eyghen geschriften my ouerghelanght int iaer 1611. inde maenden van Nouember ende December, ende beghinnen aldus.

⁺Op huyden den achsten Julij, 1610, comparerende voor my Nicolaes van Cortenbach der heyligher Pauselijcker ende Keyserlijcker authoriteyten openbaeren, ende des Eerw. Capittels der Collegiate Kercke van onser Lieuer Vrouwe binnen Maestricht ghesworen Notaris, zedert byde Raden geordineert in Brabant geadmitteert, binnen Maestricht residerende ende den gheloof-weerdighen getuyghen

+ Int Iaer 1610.

[p. 215]

onder genoemt, Hieronimus Arias woonende tot Meerssen lande van Ouermaese sijnde Spaignaert van Natien ende Chirurgijn van sijn hant-werck, die welcke aen sijn huys-vrou Elisabeth Sauckorn, dochter van Wijlen Henrick Sauckorn, in sijnen leuen Schepen der Heustbanck Meerssen voorschreuen verweckt heeft een dochter ghenoemt Agnes, die welcke out twee iaeren meestendeel cranckelijck gheweest sijnde, ende noyt hebbende connen gaen, oft oock op haer beenen connen staen alleene sonder helpe, alsoo datmen meynde dattet kint nemmermeer gaen noch staen en soude, als haere beenen niet meer ghebruyckende, dan oft gheen gehadt en hadde. Is den voorschreuen Jeronimo door den Eerw. Heer Martino Stercken, Lant-deken ende Pastoor tot Meerssen gheraeden gheweest daer voor bedevaert te doen, Alsoo dat hy Hieronimus, daer door beloefden eene bedevaert te doen inden naem van sijne dochtere tot onser Lieuer Vrouwe Capelle ende Processie diemen iaerelijckx is houdende ten Minderbroederen tot Maestricht. Het welck hy oock ghedaen heeft, ende beloeft sijne dochtere tot drij reysen toe aldaer te doen brenghen met Godts gratie. Alsoo dat hy nv lestleden Paeschmaendach wesende den elfden Aprilis sijne bedevaert heeft gedaen, volgende

[p. 216]

sijne beloften, ende alsdoen oock hebbende laeten tkint daer draghen op den arm in eenen hant-doeck van sijn maerte ghenoemt Mayke Gulickers, die welcke die Processie durende tkint ommegedraghen heeft, ende daernae haer ghebedt ghestort voor het Beeldt van ons Lieue Vrouwe, ist gebeurt dat sy het kint heeft wt den doeck van haeren arm nedergeset opder aerden, ende terstonts noch inder Kercken wesende, is het van selfs opghestaen, ende begonst te gaen, int aensien van allen den ghenen die daer waeren, het welck sulcx van sijne leuen lanck noyt van te voren gedaen en hadde, noch noyt alleen ghestaen, als voorseyt is. Thuys comende, hebben een ey int huys gheleyt, waer nae dattet gegaen ende gheloopen heeft, al oft altoos gegaen hadde, ende al noch teghenwoordelijck is gaende, ghelijck sy bouen ghenoemde gehuychsschen, ende der voorschreuen Heer Lant-deken, Thomas Fabricius Scholtes tot Meerssen, ende alle naebuers aldaer sijn attesterende geweest, ende ick Notaris oock selue ghesien hebbe dat het kint gaende was, waer van den weerdighen Pater Guardiaen der Minderbroederen tot Maestricht heeft begeert hem een act oft instrument van attestatie ende certificatie verleent te worden, het welck ick Notaris door d'attestatie voorschreuen

[p. 217]

alsoo gedaen hebbe ende in dese forme ghestelt ende ghe-extendeert. Aldus ghedaen op dach ende dato bouen geschreuen binnen den dorpe van Meersse, ten huyse vanden voorschr. Fabricio, in presentie vanden bouen ghenoemden Heer Lant-deken, Heer Merten Sterck, ende den voorschr. Thomas Fabricius Scholtes als ghetuyghen ende mede attestanten hier toe geassumeert.

Ende my Nicolaes van Cortenbach Notaris, als voorschr. is, hier toe sunderlinghe versocht ende ghebeden. Oirconde, &c.

N. Cortenbach Notaris.