T'Boeck van Ons Lieve Vrouwe van Maestricht, ende van den oorspronck des stadts, ende miraculeuse beeldt van Ons Lieve Vrouwe, rustende int convent der minderbroederen

[p. 210]

Het XXXVI. Capittel.
Van kinderen die te Tungren van ghescheurtheyt ghenesen sijn.

⁺DIe twee volghende miraekelen verhael ick wt de woorden vanden Notaris van Tungren. Sy kennelijck allen ende iegelijck die dese brieuen sullen sien oft hooren lesen. Dat ick onderschreuen tot versueck van een weerdich man, van my dat selue versoeckende door inhout van dese ghetuyghe, dat int iaer 1583, oft daer ontrent, dat mijn outste sone Jan, liggende inde wieghe seer ghescheurt was ontrint sijn schamelheyt, ende dat de moeder tkint heeft gedragen nae Maestricht totte Processie die gehouden wort tsanderdaechs nae Paesschen vande Minderbroeders. Die moeder droech haer kint met groote deuotie ghebonden in haer armen ende volghden het Beeldt van ons Lieue Vrouwe inde Processie, ende inde Kerck ghecomen sijnde, nae dat sy deuotelijck haer ghebedt hadde ghestort, soo ontbondt sy den bandt met betrouwen, ende sy lieten daer. Ende van die ure af bleef tkint gesont tot op den dach van heden. Welcke voorschr. Joannes van dier uren af niet afghelaeten en heeft (behaluen dit iaer door groote oorsake) alle iaeren sy seluen te presenteren inde selue Processie met blooten hoofde ende

+ Int Iaer 1583.

[p. 211]

voeten alleen met een lijne cleet ghecleet sijnde tot danck-segginghe van Godt die Heere, ende sijnder ghebenedijder moeder ende maeghet Maria. Het welcke ick met mijn eyghen hant ghetuyge. Den achtentwintichste May, 1607.

Henricus Vlieck van Tungren openbaer Notaris.

2. Int iaer duysent vijf-hondert ende negentich ⁺ seuen op den seuenentwintichsten dach van May, in presentie vanden Eerw. Heer Laureys van Aertsberghen Onder-plebaen van Tungren, ende Cornelis Ververs als ghetuyghen, is personelijck ghecompareert Mayke huys-vrou van Laureys van Wederen beyde borgheren van Tungren, ende heeft van selfs, vrijwillichlijck sonder bedwanck van iemanden beleden, datse eenen sone hadde ouer thien iaeren, te weten int iaer duysent vijf-hondert ende seuenentneghentich ghenoemt Jan, die doen ter tijt gescheurtheyt hadde neffens sijn schaemelheyt, den welcken sy wt deuotie om ghesontheyt te vercrijghen ghebrocht heeft totte Processie die gehouden wort tsanderdaechs nae Paesschen ter Minderbroederen binnen Maestricht, ende dat sy aldaer int ommeghaen volghde het Beeldt van ons Lieue Vrouwe, ende badt sonder ophouden met groot betrouwen Godt om gratie ende bermherticheyt, ende

+ Int Iaer 1597.

[p. 212]

Mariam de Moeder Godts. Ende als sy inde Kerck gecomen was, soo sijn tkints inghewant meer wtghevallen als van te voren, ende tkint siecker, maer sy heeft die wederom inghesteken, ende sy onbont den bant daer de gescheurtheyt mede ghebonden was, ende liet dien voor het Beeldt van ons Lieue Vrouwe. Sy loefden Godt van dat miraekel, ende sijn gebenedijde Moeder Mariam van dat weldaet, belijdende dat van dien dach af haeren sone ghenesen bleef vande voorghenoemde gescheurtheyt ende noch ghenesen ende ghesont was, tot op dese ure. Godt de Heere sy ghebenedijt inden alderhoochsten. By de vrouwe was ende stont Thomas Lansman een borgher van Tungren, ende versekerde het selfde (als die het ghesien, ende op die selfde ure teghenwoordich was) warachtich te sijn, kennelijck ende openbaer. Aldus ghedaen te Tungren int iaer, maent, ende daghe voorschreuen inde teghenwoordicheyt van ghetuyghen bouen ghenoemt,

Ende van my Henrick Vlieck, openbaere Notaris tot die voorghenoemde dinghen besunder gheroepen ende versocht.

Item te Herentals is een ghescheurt kint ghenesen.

3. Jan Cuypers borgher van Herentals, heeft by eedt beuesticht, als hy een kint wesende woonde by sijn ouders in een dorp

[p. 213]

S. Mertens Vooren ghenoemt, daer hy geboren was, niet verre van Maestricht, dat hy soo ghescheurt was dattet gheswel vande wtloopende inghewant soo groot was als een gansen ey. Die ouders droef sijnde hebben een ghelofte voorghenomen voor de ghesontheyt des kints, dat sy drij iaeren met den sone Jan tsanderdaechs nae Paesschen soude comen tot ons Lieue Vrouwe van Maestricht wt geloften ende deuotie. Als sy voldaen hadden tghene sy hadden gheloeft, soo is Jan Cuypers geheel genesen, ende en hadde voortaen geen gescheurtheyt. Hy danckte Godt ende sijn ghebenedijde moeder ende maeghet Mariam. Dit miraeckel by den zeghel vande heeren van Herentals gheteeckent door de hant van eenen openbaeren Notaris, canmen een ieghelijck toonen. . . . . . . . .

4. Men moet belijden dat Godt is die alleen wondere dinghen doet, ende als hy wilt alleen, hy is almachtich, hy en heeft onser ende onser goede wercken niet van doen, maer nochtans om dat hy gheseyt heeft, Soo wie my eere bewijst, dien sal ick oock eeren, ⁺ soo doet hy dusdanighe dinghen ter glorie van sijn vrienden, ende princepaelijck ter glorie van sijn gloriose Moeder ende maghet Maria. Wat verbiet ons dat te gheloouen? Wat helpet ons moetwillichlijck ende onwijsselijck te loochenen? Ist daerom

+ 1. Reg. 2.

[p. 214]

oock alsoo niet, om dat eenighe dat loochenen? ⁺ VVat leydt daer aen al ist dat de sommighe van henlieden niet ghelooft en hebben? Sal hen ongheloouicheyt Godts ghelooue ydel maecken? Voorwaer den dach des Heeren, hoe wel te spaede, salt den ongheloouighe wijs maecken.

+ Rom. 3.