T'Boeck van Ons Lieve Vrouwe van Maestricht, ende van den oorspronck des stadts, ende miraculeuse beeldt van Ons Lieve Vrouwe, rustende int convent der minderbroederen

Het XXXV. Capittel.
Inde stadt van Sittaert is een meyskens quaede ooghe die gesloten vvas, gheopent, ende ghenesen.

DIt naevolghende miraeckel verhael ⁺ ick wt de woorden vanden Eerw. Heer Pastoor van Sittaert, die hy tot my ouergheschreuen heeft. Int iaer ons Heeren duysent ses hondert ende seuen, voor het feestdach van Paesschen ist gheschiet

+ Int Iaer 1607.

[p. 208]

dat een dochter ghenoemt Jenneke, dochter van meester Jan Ganderheyden Borgher van Sittaert, Oudersangher ende Orgelist der Collegiale Kerck van S. Pieters aldaer, oock openbaere Notaris door d'Apostolische ende Keyserlijcke authoriteyt ende Secretaris vande Raeden te Susteren, soo ghequelt was met een quade ooge, die soo toegesloten bleeff door het aenwassende ghebreck, dat gedespereert worde van haer gesichte ende ghesontheyt weder te crijghen, soo het kennelijck was int openbaer inde stadt van Sittaert. Ende alsmen nv sach dat alle natuerelijcke medicinaele cunst niet en holpen, soo dede die moeder vande voorschreuen dochter een ghelofte, van haer dochter te leyden totte choor ende Beeldt van ons Lieue Vrouwe inde Kerck vande Minderbroederen tot Maestricht, het welck als sy dede op het feestdach van onser Lieue Vrouwe visitatie des selue iaers, soo ghevoelden sy terstont die openinghe haers ooghe, dat sy daer liet die doecken daer sy veur mede verbonden was: Ende wederom pelgrimagie houdende binnen de octaue van ons Lieue Vrouwen Hemelvaert, ende daer nae ten derde reyse op het feestdach vande Gheboorte van ons Lieue Vrouwe met haer moeder, heeft sy van dyen tijt af, ghevoelt ende ghehouden (Gode sy loff, ende zijn

[p. 209]

ghebenedijde moeder Maria) haer ooghe geheel claer ende ghesont tot op den dach van heden. Het welcke het selue meyske van my onderschreuen Pastoor van Sittaert neerstelijck gheexamineert zijnde, heeft beleden, wiens ghebreck ick oock te voren, ende daer nae haer genesinge selue met mijn ogen heb ghesien: Ende beyde de ouders van my ondervraecht ende neerstelijck ondersocht zijnde in presentie van ghelooffelijcke ghetuygenen Heer Simon van Colen, ende meester Jan Crieckelman hebben beleden dat die dingen soo geschiedt waeren, bereydt zijnde, alst noot is dat met eet te beuestigen. Dese dingen zijn geschiedt in mijn Pastoorelijcke huysinghe, op den achthiensten dach van Julius, int Jaer ons Heeren duysent ses hondert ende acht.

Alsoo ghetuyge ick Franciscus Agricola, Pastoor der Kercke van Sittaert, ende Deken vanden Raet van Susteren.
Soo belijde ick Ian Ganderheyden als boue, met onderteeckeninghe mijns eyghen handt dat dese dingen warachtich zijn.
I. Ganderheyd. Notar. in fidem.
Ick Simon van Colen, Capellaen vande Collegiale Kerck, belijde alle dese dinghen soo te zijn.
Ende ick Ian Crieckelman belijde al waer te zijn wt verhael vande Ouders.