T'Boeck van Ons Lieve Vrouwe van Maestricht, ende van den oorspronck des stadts, ende miraculeuse beeldt van Ons Lieve Vrouwe, rustende int convent der minderbroederen

Het XXXIIII. Capittel.
Van een vrou te Luyck, die bouen twee iaeren van een ongeneselijcke sieckte door ghelofte ghesont worde.

NIet alleen en heeft Maestricht ghevoelt die weldaeden van ons Lieue Vrouwe, maer oock die dorpen, gehuchten, ende omligghende steden hebben ghevoelt van de selue die miraekelen van ghenesinghen. Ick sal beginnen van Luyck, die sommige int latijn noemen Legia, vereert met eenen edelen tijtel, ghetrouwe dochter vande Roomsche Kerck. Tis een groote ende fray stadt, vol van volcx, die gheleken mach worden met die princepaelste steden van Europa, ist dat ghy de macht ende de grootheyt wilt aensien oft die godtvruchticheyt ende religie, die voor al ghestelt moet worden.

[p. 206]

2. Hier woonde Maria Darthois, huys-vrou Edmundi Fabri Segeldragher vanden Officiael van Luyck, Dese Maria heeft ghetrouwelijck vertelt dat sy met een alderswaerste ongheneselijcke sieckte ghestayelijck te bedde ligghende twee iaeren ende acht maenden, verlaeten van hulpe der Medecijnen: Waerom door raet van eene, ontrint het feestdach van ons Lieue Vrouwe Lichtmis, soo dede sy een gelofte voor haer ghesontheyt, dat sy alle iaeren te Maestricht soude comen, om de Processie van ons Lieue Vrouwe om te gaen, die vande Minderbroeders gehouden wort t'sanderdaechs nae Paesschen, dat sy dan te biechten soude gaen, ende ter taeffelen Godts, ende ter eeren van Godt ende van sijne heylighe Moeder Maria een tortse offeren. Nae dat die gelofte geschiet was, soo begost haer Maria beter te gevoelen, ende op crucken door haer huys te wandelen, ende corts daer nae vercreech sy haer geheele ghesontheyt. Sy is gegaen teghen die Processie te Maestricht, ende haer belofte op het naeste feestdach gehouden, bereet altijts te betaelen, voor die ghesontheyt door de helpe van Maria de Moeder Godts vercregen, soo lange als sy sal leuen.

⁺3. Oock heeft de selue Maria gheattesteert, als sy eens door becommernisse ende affairen, totte voorseyde Processie niet en

+ Int Iaer 1607.

[p. 207]

cost ghecomen, dat sy cranck ende sieck worde tot dat sy haer voorghenome belofte hadde betaelt, belijdende dat vrijmoedelijck gheschiet te sijn int iaer duysent ses hondert ende seuen. Want als sijt hadde wtghestelt soo is sy om haer ghelofte te houden sieck wt Luyck ghegaen den derthiensten May ende ghecomen tot Maestricht tot ons Lieue Vrouwe ten Minderbroederen, ende als sy t'sanderdaechs hadde ghedaen, tghene dat sy hadde door ghelofte beloeft, is wederom ghereyst naer Luyck sterck ende wel te passe sijnde.

Niemant en derf hem verwonderen, als hy dusdanighe middelen tot troost van het menschelijcke gheslachte gheschieden siet van ons Lieue Vrouwe, sy heeft den medecijn-meester ⁺ ghebaert, sy heeft wt haer voorts-gebrocht de medecijne van het menschelijcke gheslacht.

+ Caesar Heisterb. lib. 7. ill. mirac. c. 15.