T'Boeck van Ons Lieve Vrouwe van Maestricht, ende van den oorspronck des stadts, ende miraculeuse beeldt van Ons Lieve Vrouwe, rustende int convent der minderbroederen

[p. 236]

Het XLII. Capittel.
Van een kint dat creupel in handen ende voeten gheboren sijnde, door ghelofte des moeders inde Capelle van ons Lieue Vrouwe ten Minderbroeders ghesont is gheworden, staet int latijns exemplaer fol. 170, maer hier int lanck verhaelt.

WY Leonardus Thysius ende Hendrick Suetendael Schepenen des hooghen gerichts der Stadt Maestricht, tuyghen ende ghestaen mits desen dat op dach ende datum hier onder gheinsereert is voor ons als Schepenen voorschr. in eyghenen persoon ghecompareert, Pieter Karkens ende Jan Karkens ghebroeders onse medeborgheren, Elisabeth vanden Haghen, weduwe van Jacob Karkens, grootmoeder van Pieter Karkens, sone van Dierick Karkens, ende Ida Royen paervolcx beyde inden Heere ghestoruen, in bywesen Maria Gielis ionghedochter out xxvi. iaeren, de welcke op hun mans waerheyt sijnde altijt bereyt by solemnele eedt te beuestigen, hebben gheaffirmeert ende gheattesteert waerachtich te sijn dat de voorschr. Pieter Kaerkens out ontrint al by de vijfthien iaeren, dat de selue van ioncks op niet en heeft cunnen gaen oft staen, maer op handen ende voeten ghecropen, ende op twee crucken tot dat hy out is gheweest

[p. 237]

ontrent vijf iaeren, Ende als dat de moeder des voorschr. Pieter voorgenomen heeft gehadt (ghelijck sy oock ghedaen heeft) negen vrijdaghen achtermalcanderen volghende, te gaen nae de Capelle van ons Lieue Vrouwe ten Minderbroeders, om aldaer haer deuotie te storten, ende haeren voorschr. sone mede te leyden ende oock te draghen, om de selue Moeder Godts te bidden, dat door haer intercessie dyen voorschr. ionghe soude moghen ghenesen worden: Ende alsoo sy Maria Gielens, Barbara haere sustere gheassocieert met Christina ende Elisabeta Karkens gesusteren vanden ionghen Pieter Karkens, met drij andere ionghe dochters hebben den lesten vrijdach gheaccompaigneert den voorschr. Pieters moeder tot inde Capelle voorschr. alwaer oock waeren diuersche persoonen in goeden ghetal, dat alsdan by de moeder der voorschr. Pieter hebbende een Misse laeten lesen, om te bidden voor haer soons ghesontheyt: die Misse gecelebreert sijnde, heeft die voorschr. Pieter sijn beyde crucken aldaer inde Capelle van ons Lieue Vrouwe ghelaeten, ende is sterck ende gesont geworden, alsoo dat hy met sijn moeder ende ionge maeghden voorschr. is nae huys ghegaen sonder crucken, ende sijn gesontheyt vercreghen, sonder dat zeedert oyt ghegaen heeft met crucken, ende soo

[p. 238]

ghewassen nv tot sijnen ouderdom van vijfthien iaeren, gelijck ons ghebleken is, dat alsnv seer wel is gaende, staende, rechte beenen hebbende, daer nochtans te voren sijne beenen waeren crom ende slap hangende. In tegenwoordicheyt vande voorschr. Schepenen hebben dyen voorschr. persoonen sulcx iteratiue hun voorghelesen, sijnde geconfirmeert, gelaudeert ende geapprobeert. Gegeuen in onse Stadt Maestricht op den xx. Decemb. Anno xvi.^c ende elffue.

De mandato Dominorum, Scabinorum, Praescriptorum,

D. Porta, Secretaris.