T'Boeck van Ons Lieve Vrouwe van Maestricht, ende van den oorspronck des stadts, ende miraculeuse beeldt van Ons Lieve Vrouwe, rustende int convent der minderbroederen

Het XXXI. Capittel.
Van ghescheurde die ghenesen sijn.

⁺REynier Bormans borger van Maestricht heeft gehadt eenen sone Franssen die bouen gheloof seer gescheurt was, om welcken te ghenesen te vergheefs alle medecijnen gheproeft sijn, soo dat de medecijns wanhopten van sijn ghesontheyt. Sijn moeder nam voor haer, haeren sone te bringhen tot die Minderbroeders voor ons Lieue Vrouwe. Sy heuet ghedaen, ende alsser eenighe Missen ghelesen waeren voor de ghesontheyt van haeren sone, soo ontbondt sy den bant, daer hy altijts mede ghebonden was, ende honck dien

+ Int Iaer 1567.

[p. 197]

aen het Beeldt van ons Lieue Vrouwe. Dat ghedaen hebbende, soo heeft terstont het kint sijn ghesontheyt ghecreghen, ende heeft veel iaeren daernae ghesont gheleeft, ende heeft een huys-vrou ghetrout, ende kinderen by haer verweckt.

2. Margriet Meyers woonende te Maestricht heeft openbaerelijck getuyght, dat haeren sone Franssen Meyers, als hy seuen iaeren out was, dat hy met gescheurtheyt gequelt was, ende dat alle die remedien die sy ghebruyckt hadde niet en hilpen. Die moeder dede gheloften, dat alsoo langhe als sy soude leuen, dat sy bervoets ende int lijnen soude gaen inde Processie van ons Lieue Vrouwe, die vande Minderbroederen gehouden wordt. Nae dat sy de ghelofte hadde voorghenomen, soo is Francoys ghesont gheworden, geen teecken van ghebreck achterlaetende.