T'Boeck van Ons Lieve Vrouwe van Maestricht, ende van den oorspronck des stadts, ende miraculeuse beeldt van Ons Lieve Vrouwe, rustende int convent der minderbroederen

Het XXXII. Capittel.
Van veel die genesen sijn wonderlijck van verscheyde sieckten.

MArgriet Bacher, weduwe van Jan Meyers, hadde een dochter Mayke genoemt die out wesende derthien iaeren, is gevallen in een swaer sieckte. Die moeder nam een ghelofte voor de ghesontheyt haers dochters, dat soo haest als de dochter soude cunnen wt den huyse gaen, dat

[p. 198]

sijse ons Lieue Vrouwe totte Minderbroeders soude laeten gaen besoecken. Sy is gegaen, maer door de groote coude met haer daeghelijcksche cleederen. Als sy inde Kerck hadde ghebeden, is achterwaerts ouerghevallen in een flaute, beschreyende dat sy haer voorgenomen ghelofte niet betaelt en hadde. Maer als sijt tsanderdaechs hadde ghedaen, is subitelijck ghenesen gheworden.

2. Weynighe iaeren daernaer is de selue Maria wederom seer sieck gheworden, alsoo dat haer de doot ten ooghen wtsach, ende men meynden dat sy soude hebben ghestoruen: Soo beloefden sy selue, soo lanck als sy leuen soude dat sy inde voorschreuen Processie tsanderdaechs nae Paesschen altijts soude ommegaen bervoets, ende int lijnen. Niet langhe daernae is sy teelemael vande sieckte ghenesen. Leeft nv noch, ende heeft dat publickelijck ten heylighen ghetuyght te Maestricht, dese dinghen aldus gheschiet te sijn.

⁺3. Catlijn de huys-vrouwe van Willem Nijpels borgher van Maestricht, ontrint voor twintich iaeren, veerthien dagen naer haer kinderbede, is bevangen met een vreesselijcke pijne door gants haer lichaem, en cost snachts noch daechs rusten, ende riep groote ende ellendige schreeuwinghe. Sy nam sulcke een ghelofte voor haer, dat sy

+ Int Iaer 1588.

[p. 199]

neghen daghen lanck lesen soude het ghemeyn ghebedt met die Engelsche gruetenisse, ende dat sy drij naestvolghende iaeren inde Processie van ons Lieue Vrouwe totte Minderbroeders int wullen ende bervoets soude gaen. Eer dat die neghen daghen om waeren is sy gants verlost gheweest van dese pijne.

4. Nicolaes van Valckenburgh borgher ⁺ van Maestricht hadde een dochterke Anneke van Valckenburgh, die een iaerich sijnde, soo sieck ende mismaeckt is geworden, dat veel menschen quamen om haer te sien voor een monster. Haer mondeke was altijt wijt open, nauwelijcx en sachmen int hooft de ooghen. Beyde de maerten Catlijn van Meerssen, ende Anneke, droeghen t'meysken te Sittaert tot eenen experten Chirurgijn om dat te ghenesen. Maer hy seyde dat te spaede ghewacht was om haer te ghenesen, iae hem docht dattet doot was, nietemin hy namse onderhanden, hoe wel dat hy de sieckte niet en ghenas. Anneke van Swartzenburgh gaf de bedroefde moeder in, datment kint drij vrijdaghen achtermalcanderen soude draghen totte Minderbroeders. Sy hebben dat ghedaen op de ghesette daghen, op welcke daghen oock Anneke vasten te water ende ten broode, ter eeren Godts ende sijns ghebenedijde Moeder ende maeghet

+ Int Iaer 1690.

[p. 200]

Maria. Eer dat den derden dach ghecomen was, begost het dochterke te lacchen, ende sloot haeren mondt, ende adt. Dagelijcx stercker wordende, is volcomelijck genesen ende gaet nv in haer achtien iaeren.

⁺5. Francoys Muelepas van Maestricht, out wesende drijendertich iaeren, viel in een swaer sieckte, dat hy meynde daer van te steruen. Op den Paesch-dach hoe wel hy met een groote pijne der herten was bevangen, nochtans tsanderdaechs daernae, is hy met een groote vlieticheyt wt den bedde opghestaen, om nae sijn manier met die andere de Processie van ons Lieue Vrouwe om te gaen. Hy heeft ommeghegaen, terstont heeft hy sijn gheheele ghesontheyt vercreghen.

⁺6. Mayke Meyers, van de welcke wy noch bouen gesproken hebben, heeft ghetuycht, dat als sy nv drijendertich Jaeren was, ende gehoudt was met Dierick Anthonisse dat sy seer sieck is gheweest van haer kinderbed, ende lach onder haer heylige Kercken rechte, alsoo dat een yegelijck meynde dat het eynde des leuens seker aenstaende was. Soo dede sy een ghelofte voor haer gesontheyt, dat sy voortaen drijmaels den wech die gheordineert is totte Processie van ons Lieue Vrouwe soude bervoets ende int lijnen ommegaen. Nauwelijckx en was een halff ure ghepasseert,

+ Int Iaer 1593.

+ Int Iaer 1599.

[p. 201]

oft sy en worde vande saere sieckte verlost. Op een oogenblick viel van het hert de pijne, van het lichaem de sieckte, dat een yegelijck hem verwonderde. Gevraecht zijnde van anderen, by wat redene dat sy soo onuersins ghesont was gheworden? Van Godt (seyde sy) ende vande moeder Godts Maria heb ick sterckheyt ende dese ghesontheyt vercreghen.

7. Damiaen Pras ende Mayken Bormans ⁺ zijn huys-vrou borghers van Maestricht, meynden dat Lijsbeth hun dochter betoouert was, van haer ses maenden aff, al haer vleesch verteert zijnde, hinck alleen het vel aen die beenkens, noch ten const steruen, noch leuen: die schenen, die voeten, die armen waren wtghetrocken als ommegedraeyt. Die ouders ghetuychden dat tkint soo ellendich was, als oyt een mensche cost wesen. Tviel hun in, tkindeken te stellen voor ons Lieue Vrouwe, ende aldaer voor tkints saelicheyt te bidden. Het welck alst gheschiedt was, in de selue Capelle van ons Lieue Vrouwe, soo begost allenskens het kindeken te genesen, ende die beenen ende de armen worden weer op de plaetse der natueren ghestelt.

8. Catlijn huys-vrou van Willem Nijpels ⁺ vallende in een alderswaerste sieckte, worde van een ieder ghedespereert langher te moghen leuen. Soo dede sy een ghelofte

+ Int Iaer 1599.

+ Int Iaer 1606.

[p. 202]

soo sy noch somtijts hadden ghedaen, dat sy de Processie van ons Lieue Vrouwe omme soude gaen met blooten voeten alleen int wullen ghecleet. Sy heuet gheloeft, sy heuet ghedaen, sy is ghenesen.

⁺9. Soo blijckt metter daet die machtichste ende godtvruchtichste liefde met begheerte van medoogentheyt ende wille van de helpe der alder-reynichste suyuere maghet ende moeder Godts Maria. Tot dese fonteyne sal haestelijck loopen onse dorstighe ziele, &c.

+ D. Bern. ser. 4. de Assumpt. B. Mariae.