Den nieuwen verbeterden lust-hof gheplant vol uytghelesene, welgherijmde, eerelijcke, amoreuse ende vrolijcke ghesanghen
(1607)–Michiel Vlack–
AuteursrechtvrijOp de voys: Elaes amour.
Ghy boose Werelt quaet
Gaet rasen, swerven, kerven,
Schoon ghy beperelt staet,
Ghy sult verwerven, t' sterven,
En t' verderven, erven fel,
Oock een swaar benouwen, schouwen
Trouwen, bouwen, gaet ghy snel
En bereyt u hier die hel.
V vrueght verkeeren sal,
Soo wy van desen, lesen.
| |
[pagina 22]
| |
God wil verneeren al,
't Stout opgheresen wesen,
't Ongenesen, vreesen moet
En door quae gheruchten, duchten,
Suchten, vluchten, onverhoet
Ghevoelen die helsche gloet.
V boose lusten siet, die doot voor 't leven geven
Ghy comt tot rusten niet
Maer sult verdreven, beven,
Boven schreven, sneven, veer
Doolen sonder meenen, heenen
Weenen, steenen sult ghy zeer,
Als verschijnen sal die Heer.
Ghy sult beclaghen och
t'Haten, t'benyden, t'stryden,
't Hert sal u knaghen doch
Vreught sal ter syden glyden,
T' allen tijden, lijden swaer
Zult ghy oock vol schanden, branden
Handen, tanden sullen daar
Wringen, clapperen te gaer.
Zijt princelijck bedacht,
Blijft gheen verlooren, dooren
Neemt op Gods rijcke acht,
En comt zijn tooren, vooren
Godts verkooren, hooren vrueght,
Die haer met zijn gaven, laven,
Graven, draven wilt na deught
(Tgae soo God wil) met gheneught.
|
|