Den nieuwen lust-hof
(1602)–Michiel Vlack–
AuteursrechtvrijOp de 'wijs: Laestmael met also blyde sinnen.DIck heb ick mijn Lief ghebeden
Menighmael om trou ghevraeght,
Maer zy stelt my niet te vreden
Dus het God moet zijn gheclaeght,
Ick heb haer veel deught ghedaen
Maer zy en wilt niet verstaen,
Met haer loop ick achter straten,
Singhen, springhen, lacchen, praten,
's Avonts by die Mane-schijn
Ist een vreught by haer te zijn.
Zy laet my al vast verlanghen,
En zy wil niet zijn ghetrout,
Als een dief die noo sou hanghen.
Zy een achter deur op hout,
Wat ick haer vermaen of preeck,
Zy hout al haer oude streeck
't Valt verdriet soo langh te vryen
Sonder yet weer te bedyen
Och hoe dick heb ick gheseyt
Doot hoe quelt my dese Meyt.
| |
[pagina 68]
| |
Vroom heb ick voor haer ghevochten
Bey mijn scheenen schier aen tween,
Die te voren weynigh dochten
Hebben nu al blauwe ste'en
Ist niet tijdt dat zy eens seyt
Nu ben ick tot trou bereyt,
Maer sint velten magh haer halen
Zy laet my noch achter dralen,
Ick meen zy sou wel beter coop
Gheven, tooch ick opter loop
Prince.
Mijn dunckt ick wil haer begheven
Die my dus hout opter tuyl,
Soud' ick soo mijn jonghe leven
Gaen verslyten arme uyl,
Ick sal segghen openbaer
't Sou wel dueren seven jaer
Meijsken ick wilder niet meer af praten,
Wilt ghy my niet, ghy meught my laten,
Hay die Werelt is so wijt,
Misselijck wie my noch verblijt.
Finis. |
|