Den nieuwen lust-hof

[LIef int secreet, mijn jonck hert krencken doet]

Op de wijs: Enghelsche Fortuyne.

LIef int secreet, mijn jonck hert krencken doet,
Sonder s'liefs weet, ick wel bedencken moet
Hoe ick my schick, my comt te voren staech

[p. 17]

 

Liefde die ick tot d'uytvercoren draech.

 

Haer ooghskens claer, my somtijdts schencken// soet

 

Een zeer eerbaer loncksken en wencken// goet

 

Welck my mijn hert, int alderdiepste prickt

 

Ende met smert, ontroert ende verschrickt.

 

Een swaer gesucht, uyt 'shertsen diepen gront

 

Volght seer beducht, daer naer treur ick terstont,

 

Alsmen haer naem, in mijn presenti noemt

 

Loopt 'tbloet te saem, en ander verve coemt.

 

Niemant en weet, nochtans wat dat mijn let

 

Want int secreet, is mijn liefde gheset

 

En de noot mijn, noch gheen persoon geclaeght,

 

Den Medecijn, noch om geen hulp gevraeght.

 

Maer vrye noch, met d'ooghen nu alleen,

 

Maer lacy och, 'thert is niet wel te vre'en

 

dat het niet mach, door den mont spreken// uyt,

 

Zijn zwaer gheclach, ende gebreken// uyt.

 

Dus neem ick waer, bequame uer en stont

 

Om eens met haer, te spreken mont aen mont,

 

Als oogh en oogh, malkandren coment by

 

En 'tharte pooght, daer het oogh naeder zy.

 

Comt duijfkens hier, die Venus waghen trect

 

Neemt dit papier, en brenght het wel perfeckt,

 

Een Jonck-vrou schoon, die soo veel deughden heeft

 

Als een persoon, die op der aerden leeft.

 

Prince.

 

Want zy is mijn, Princes, en ick wil haer

 

Eeuwighlijck zijn, een oprecht trou dienaer,

 

Na mynen sin, is zy 'thooghste Juweel

 

Dat ick bemin, onder duysenden veel.

Die in rechte liefde verkeert,

Aensiet maet noch staet,
Noch goedt noch quaedt,
Dan de persoon die hy begheert.