Den nieuwen lust-hof

[p. 1]

Liedeken

op de wyse: Gheselleken du most wandelen, &c.

INt hert ly ick van binnen// pijn
Dies heel ontroert die sinnen// zijn
Om u deughdsame maecht.
Die listigh hebt ghejaecht
Int vierigh net van minnen// mijn
Dat Venus dede spinnen// fijn
Twert Cupido gheclaecht.
Hoe deerlijck ghy my plaecht
Ghedoocht dat hy mach schieten
In u der liefden schicht.
En laet doch my ghenieten
V vriendelick ghesicht.
Daer hy door spandt
Zijn boogh en plandt
In my dit swaer ghewicht
Twelck my ontmandt
Door swaren brandt,
Ten zy ghy my verlicht.

Nochtans ick met begheeren,, goedt

V altoos jonstigh eeren// moet
Op hoop oft ghy int endt
V straffe zinnen wendt
Soo ghy v tot verneeren// spoet
Vreught sal in my vermeeren// soet
In stede van 'telendt
Dat my nu houdt verblendt
In d' onbreecklijcke banden.
Ist niet een sware last
Daer my 't begheert in spanden
Tot v persoon zeer vast.
Melancoly
En vreughts party
Daghelijcks in my wast
Dies vind ick my
Gheduerigh by
Die slaverny vergast.

Toont aen mijn gheen moordadigh// feyt

Maer bewijst u ghenadigheyt
Als een eerbare vrouw.
Tont haer Minnare trouw
Na troost mijn hert ghestadich beyt

[p. 2]

 

Dat ghy van u versmadich// scheyt

 

En moet sterven van rouw

 

So ghy o reijn carssouw

 

My niet in wilt ghenesen

 

Van 'tgheen door Venus kindt

 

Int herte is gheresen.

 

Hierom v wel besindt

 

Waer toe dees haet

 

Dat ghy dus quaedt

 

Mijn vrolickheydt verslindt,

 

Daer naest God staet

 

Mijn toeverlaet

 

Op u, o liefbemint.

 

Prince.

 

Princes neemt op dees reden// acht,

 

Laet hebben mijn ghebeden// kracht

 

By u, soo't mach gheschien,

 

Mijn leedt suldy doen vlien,

 

In dese daedt gheen wreeden// slacht

 

Maer u lof te verbreden// tracht

 

Met jonst t'mywaerts te bien

 

Daer ick door mach bespien

 

V hert oprecht en goedich

 

Om u dienaer t'ontfaen

 

Die tot u bidt ootmoedich

 

Of ghy hem wilt ontlaen

 

Van 'tswaer verdriet

 

Dat my gheschiet

 

Door Cupidoos bestaen,

 

Doch van u niet

 

Sal blijcken yet

 

Eer mijn de doodt komt aen.

Wie cant ontvlien?