Den lvst-hof van de christelicke zielen
(1600)–Jacobus Viverius–
Auteursrechtvrij
[pagina 138]
| |
X I V. De Maeghet Besluytet het tweede deel.O Mijnen beminden, het waere wel goedt dat wij het tweede deel gheheel verclaerden; Doch het is soo claer gheschreven, dat het geene verclaeringe en behoevet. Dat elck maer wel naer de Omstandigheden sie. Verwonderen haer eenighe slechte lieden, Dat den clanck des Gheschuts van ons naer ghedaen Ga naar margenoot+ wordet: [Als Bous Bous ghingh het gheschut, Dat de Gheleerde Onomatopoeian ofte stemdichtinghe naemen] wij verwonderen ons, dat sij haere eyghene schande niet en decken. Ga naar margenoot+ Verwonderen haer de Redenrijckers, dat wijse Licht naemen ende straf aen spreken; Wij spreken de boose aen, die quaelick weten wat Reden is, ende beter Clap-rijck moghten ghenaemet worden. Dan den eenen hoop met den anderen: Alle de ghene die Godes gaeven misbruycken, moghen toe sien. Wij hebben ghedaen, ende segghen vrij uyt: Daer gaen wij henen. Zijn u onse Dichten onnut, ons sullen sij nut wesen. Dit zij het Besluyt van de twee Eerste deelen (van achter te beghinnen op de Hebreeusche wijse) God heeft dese Landen uyt het slijck gheraepet: Het is wel reden dat sij hem dienen ende beminnen; niet met den monde alleyn: maer metter herten. Het welcke men sal ghelooven dat sij doen, Als de aerme niet met een stuck broodts [dat gheeftmen eenen hondt wel] maer inder daedt worden gheholpen. Doch dat moet, dat moet, van boven commen: want op der eerden snaptmen wel vele van Liefde: doch hoe de selve daer vercouwet is, dat weten de ghene die't besocht hebben. Daer mede sal ick dij bij mijne Moeder bringhen, sij sal selve haeren lof verclaeren: want ick en wil dij maer desen dagh aen de verclaeringhe laeten. De Eenvoudighe Christenen sullent int ghoede nemen: De andere moesten ons van haer werck laeten sien, eer wij veel van haere woorden houden. Wij scheydender uyte: Dat sij de Penne in de handt nemen, ende soo constigh dichten, dat men ons dicht niet en wille lesen. In het verbeteren is het al gheleghen. Aldus nemet de verclaeringhe van het Tweede deel een EYNDE. |
|