Den lvst-hof van de christelicke zielen
(1600)–Jacobus Viverius–
AuteursrechtvrijOp de wijse van den 8. Psalm.
O Groote God, ick wil dij gheeren Prijsen;
Dan ick en can dij, O Heer, niet * Volprijsen:
Want (siet !) ick ben dijn alderswackste kindt.
Volcomen niet men bij den mensche vind't.
2. Du bist een * Oogh die alle dinghen mercket:
Du bist een * Handt die alle dinghen wercket:
Du bist een * Licht oneyndigh, over al.
Dijn Wijsheydt, Heer, maeckt's 'wereld's wijsheydt mal.
3. Waer ick mij keer, het zijn al wonderwercken:
Mijn ooghe * traen't door het gheduerigh mercken:
Dijn Wijsheydt groot men mercket over al:
Des Heeren Gheest * doordrencket bergh en dal.
4. De Sterren claer, De Sonne ende Maene,
De cruyden groen, die spreken mij al aene:
Comt hier; swack kindt, den Schepper door ons kent,
Ick sie * God's beelt in alle dingh gheprent.
5. O * Son, wat doet dij soo ghestaedigh loopen ?
O * Maen, wat comt dijn cromme hoecken cnoopen ?
O Cruydt, wat leert dij dat het Somer is ?
Des Heeren Gheest werckt alle dingh ghewis.
6. Du hebst, O Heer, al wat leeft Ziel ghegheven:
Daer om wordstu van alle dingh verheven.
De * Mieren cleyn vergheten dijnes niet.
God wordt ghelooft van al t'geen men siet.
7. De * Eerdt wert wel dat du haer hebst ghegrondet:
De Zee, O Heer, selfs dijnen Lof vermondet:
De Locht roept uyt, met Hemel, Vier, * Nat, Eerdt;
Al onse cracht comt van den Schepper waerdt
8. De * Enghels reyn, dijn Boden en Dienaeren,
Dagh ende Nacht dijn 's Naemes Lof verclaeret:
Wat segh ick * Nacht ? Het is voor God al dagh.
God is een Licht dat niet verdempt zijn magh.
9. Den Mensch magh ick een * meesterstuck wel naemen;
Hoe wel de sond hem seere cont beschaemen
Een * Wereld cleyn de Mensche is bekent.
Des werelds beeldt is [...]
10. Hoe wordt de Mensch in's moeders lijf ghewonnen,
Hoe wordt het bloedt door het wit nat gheronnen
Al dat gheschiedt op eene Vremde wijs.
Des menschen dracht roept oock uyt Godes prijs
| |
[pagina 18]
| |
11. Als dan den Tijdt van * Baeren is ghecomen,
Wordt hij met cracht het * Duyster Veldt ontnomen:
De Moeder can den tijdt uytsetten niet.
In de * Gheboort men Godes Werckingh siet.
12. O Groote God, dijn Wercken zijn soo vele,
Dat ick eer sal begaen een heessche kele,
Dan dat het al Ghepresen wordt van mij.
* Vol maeckten Lof moet God sich brenghen bij.
I. Rvst-stede.
13. Wie sal, O Heer, dijn Goedtheyt groot volprijsen,
Hoe du den Mensch doetst van den val oprijsen ?
Sie ! dat en can van mij niet zijn ghedaen.
Gods Wercken groot den Mensch te boven gaen.
14. Wat wasser doch, O Heer, aen ons bedreven,
Dat dijn Reyn Lam voor ons dij gaf sijn Leven ?
Du en behoefst de * eerden vaeten niet.
T'is door Ghenaede dat God weert ons verdriet.
15. Ick ben seer swack van lichaem ende leden:
Als onnut kindt was ick al hier vertreden:
Elck * schudde mij den cop toe, Heere goedt:
De Mensche is voor den Mensch * Wolf verwoedt.
16. Wat salmen doch met dit swack Kindt beginnen.
Sprack ijder mensch ? Sie ! Het is sonder sinnen !
Voorwaer ten dient, ten dienet, nerghens toe.
Der dwaesen rugh ghemaeckt is voor de roe.
17. Ick creegh (O * Wee !) den dagh door vele slaeghen:
Men woudt mij als * Esel traegh voort jaeghen.
Door slaeghen wreet wierdt de Gheest noch meer duf:
On-matigh slaen maeckt Jonghe sinnen suf.
18. Den heelen dagh was mijne oogh vol traenen:
Want niet dan smaedt hoord ick van mij vermaenen:
Ick * vloeckte seer de uyr dat ick voort quam
De mensch niet leeft als God op hem is gram.
19. * Tien duysent mael quam mij de Satan nooden
Om Lijf en Ziel (om Lijf en Ziel !) te dooden:
Met * water, bast, met messen, lockt' hij mij.
De Satan loert op eene Ziel onblij.
20. Tien duysent mael braght hij mij wel tot sonden,
Om mijne Ziel (om mijne Ziel) te wonden.
Altijdt, altijdt, was Satan mij ontrent.
Op onse Ziel de Draeck sond's brandtmerck prent:
21. Ick sagh eens * om: Och salder niemant wesen
| |
[pagina 19]
| |
Die mijnen druck sal helpen en ghenesen ?
Siet elck liep wegh, om mijnen snooden staet.
Die hulp behoeft men sonder hulpe laet.
22. Siet, dijnen Geest Sprack: Aenbidd' God de Heere:
Hij helpt elck een die op hem hoopet seere !
Ick riep, ick badt, om Wijsheydts reyne bloedt.
Die Wijsheydt heeft die heeft het * Hooghste Goedt.
23. Seer langhe tijdt (ick segh seer vele jaeren)
Was mijne Ziel, O Heer, in groot beswaeren:
Het is om niet (seyd' ick) wij zijn veracht !
Den tijdt valt langh voor de geen die verwacht.
24. Mijn Ziel verloos haer leven door het beyden:
Mijn oogh wierdt * droogh door het gheduerigh schreyden:
Het swacke kindt verdween door het ghequel:
Als men God derft dan is men in de * Hel.
I I. Rvst-stede.
25. Siet ! Wijsheydt soet, * Theovsphia Minnigh,
Die quam (die quam !) die quam bij't kindt onsinnigh:
Legh af den druck: hier is nu vreught voor dij !
De herten droef wilt de Heer maecken blij.
26. Sij nam haer bloedt en * waschte mijne vlecken:
Met haere tongh quam sij mijn * wonden lecken:
Met haer * wit cleedt heeft sij mijn Ziel bedeckt:
God's Wijsheydt soet de doode Zielen weckt.
27. Sij custe mij met hondert duysent soenen:
Haer * lipkens roodt die quaemen druck versoenen:
Haer * armen wit omvinghen het swack kint,
Gheen beter Min dan als Gods Wijsheydt mint.
28. Sij leydde mij in haere * Hoven groene:
Sij braght mij Man, om mijne Ziel te Voe'ne:
Ick soogh haer Spon, die suyckersoete was:
Des Wijsheydts Spon * verquickt de Ziele ras.
29. Du salst altijt, sprack sij, gheluckigh wesen,
Soo mijne Spon niet wordt van dij mispresen.
Soo mijnen Lof van dij verbreydet wort.
Als God ons helpt tot Loven hij ons * por't.
30. O dat altijdt dijn Wijsheydt mij omvanght:
Want ick altijdt naer mijn Lief seer verlanghe:
* Val ick in sond, wil straffen niet Ghenaedt.
Als God niet straft bereydt hij een groot quaedt.
31. Op mijn verdienst is dit werck niet begonnen
T'is van mijn Lief * gherocket en ghesponnen:
Tghebreck is mijn [soo hier ghebreck in is]
| |
[pagina 20]
| |
De schutter goedt schiedt wel een scheute mis.
32. Och wil altijdt de * lesers van mijn dichten
Door dijnen Gheest, O Vader goedt, Verlichten,
Dat niet een Ziel door mijn ghedicht vergae !
De * quade maegh lijdt door goe spijse schae.
33. Wil dijne Kerck, O Heere, niet verlaeten !
Verdelgh al die die dijne Kercke haeten !
* Verleyders boos straf tot in't derde let !
Wee ! wee ! op hem die sich God teghenset !
34. Het volck verblindt door sond en valsche leere
Wil maecken claer, op dat dij yder Eere:
Gheef onse Jeught tot dijne Wijsheydt lust:
Soo wie God Mint de sonde niet en cust.
35. Ghij Enghels reyn, en ghij, O Goede lieden,
Mint mijn Vrindin, en wilt haer Eere bieden:
Siet ! mijn Vrindin is een * Goddinne weerdt.
Die God bemint crijght meer dan hij begheert.
|
|