Versamelde gedigte

Huwelikslied

(Te sing op die melodie van ‘All joy be thine’, deur Wilfred Sanderson.)

Mag altyd rose van geluk u wag,
Langs heel die lewensweg u teëlag;
Mag goue sonskyn in u harte troon,
Met liefde u banier, u lewenskroon;

Mag Hoop u metgesel wees op die reis
En Moed vir alles wat die lewe eis;
Mag Vreug weergalm vanuit u karavaan:
'n Lied vir elke mylpaal van die baan.

Mag Liefde altyd bly die sterke band
Wat hart aan hart verbind en hand aan hand -
Die leid-ster wat u voer oor berg en dal,
Die Hawe van u Hoop as die awend val!

Die Huisgenoot, 8 Februarie 1929