Versamelde gedigte

Noag se Ark

(Met die welsprekendheid van iemand wat 'n sweep in sy hand het en 'n pluiskeil so effens skuins agteroor gestoot)

Al die grootwild uit die ark
Staan al twee-twee op die mark.

1 Die olifant

Hierdie gomlastiekkalant
Met 'n stert aan elke kant,
Met sy turfvel kaal en skurf,
Met sy langslang van 'n slurf,
Is die
Olie-
rolie-
polie-
katjie-
poetjie-
olifant.

2 Die renoster

Die droster met sy vaal karos,
Daar by die wag-'n-bietjie-bos,
Met die dik opnaaisels in sy huid,
Met 'n tandestoker op sy snuit -

[p. 300]

 

Dit is mos

 

die Agteros-

 

sambok-

 

renosteros.

3 Die dromedaris

Die harige ou harlekyn,
Die Fordkar van die sandwoestyn,
Met 'n rolvat water in sy inventaris,
Wat nog altyd silwerskoon en klaar is,
Is die
Kalaharie-
Sarie-
harie-
blikkanarie-
drome-
daris.

4 Die seekoei

Die ou vetsak wat daar woedend brul,
Is die bitsige ou seekoeibul.
Wat sê u, hooggeleerde Dominee?
Is dit 'n contradictio in terminee?
O nee, ek weet hy is gedoop aldus:
Die
Hiep-hiep-hiep
hoerê-
po-
potamus.

[p. 301]

5 Die kameelperd

Die ou langenekker op-en-af,
Met sy alkant-selfkant-draf,
Met sy klein verdwaalde koppie
In die hoogste boom se toppie,
Is ou
Veertien-
voet-
van-
seerkeel-
as-
hy-
keelseer-
kry-
giraf.

6 Ensovoorts

Daar's nog goed met wreder name:
Kwaggas uit die Kraggakame,
Piering-pinang-rottang-blatjang-oerangoetangs,
Middellandse-see-se-ruben-simeon-leviatangs.
Kom jul môre oor 'n week weer, dan miskien
Sal al die arkebroeders jul vir hul en hul vir julle sien.