Versamelde gedigte

In manus tuas, Domine
(Elegie)

Klein Gielie is nie meer nie, en die wêreld
is 'n liewe glimlaggie armer.

Die môre van sy lewe
Het heerlik skoon beloof;
Die Here het gegewe:
Sy naam die sy geloof.

Verydel ... hoop en drome;
Verklink, helaas, die lied ...
Die Here het genome:
Sy heil'ge wil geskied.

‘Waartoe die lewenswonder,
As in U hoë raad
Sy son weer moes ten onder
Nog met die daeraad?’

Deur trane van verlange
Daal sag 'n fluist'ring neer:
‘uit Vaderhand ontvange:
in Vaderarme weer.’