Versamelde gedigte

Oorsaak en gevolg
Post hoc ergo propter hoc.

‘Nou gaan daar seker iemand dood:

Die hond doen niks as huil,

En op die huis se vors sit steun

Hoe-hóé, hoe-hóé 'n uil.’

Tant Elsie skrik en wonder wat

Daar in die donker skuil.

Tant Elsie laat ‘die boeke’ haal

- Wat is 'n sterweling? -,

En met 'n krakie in haar stem

Begin sy hardop sing.

Die ander dag was Fido dood -

Die uil ook - arme ding!