Een claer ende doorluchtich vertooch van d'Alckmaersche kerckelicke gheschillen
(1611)–Adolphus Venator–
Auteursrechtvrij
[Folio 51r]
| |
De neghen en tvvintichste verthooningh.Schaghen ende Rabbijn, tvvee Burghermeesters, t' saemen sprekende; daer naer comen veel persoonen, als Schepenen ende Vroeden, neder sittende op bancken; eyndelick comen de Commissarissen met haren Greffier, pronuntierende de sententie.
Schaghen.
Wel Confrater hoe staen de stucken?
Rabbyn.
Ick vrees ten sal niet wel lucken.
God gheve dat ick dool in mijn vermoeden.
Schaghen.
Ist soo? Hy sal te stouter teghen ons woeden,
God wil ons hoeden // voor quaet ontmoet.
Rabbyn.
Hoe 't is, dat worden wy nu haest vroet:
Maer wy worden ghegroet, van de Vroeden die comen,
Dies laet ons gaen neder sitten sonder schromen,
Ende hooren der Commissarissen reden.
Schaghen.
Wel gaen wy dan, ick ben te vreden.
Eerste Commissaris.
Eersame Heeren der Stadt Alckmaer,
Wy zijn tot u ghecomen in 't openbaer,
Ende u Lieden hier by een doen vergaren,
Om voor u Lieden het vonnis te verclaren,
Het welck het Hof heeft gaen besluyten:
Daerom op dat wy 't nu te deghen uyten,
Soo gheeft alt'samen goe audientie;
Tsa Greffier leest ons de Sententie.
De Greffier leest.
GHesien inden hoogen Rade in Hollandt uyt crachte van sekere speciale commissie ende authorisatie vande Heeren Staten van Hollandt ende VVest-vrieslandt, in date den 17 Ianuarij, ende acte van bevvillinghe vande | |
[Folio 51v]
| |
Vroetschap der stede van Alcmaer, vanden 23 der selver Maent, beyde lestleden daer opgevolcht. De poincten ende articulen overgelevert den Commissarissen vanden selven Rade, tot laste van Adolphus Venator, dienaer des VVoorts binnen der voorszeide stede. Mitsgaders d' informatien daer op ex officio genomen, mette stucken ende verificatien onder henlieden geexhibeert; als oock de verclaringen ende responsiven daer jegens by Adolphus Venator voor den voorszeide Commissarissen by monde gedaen. Ende gelet op allen t' gene daer op in desen eenichsins te letten stont, ende behoorde te moveren. T' hof doende recht uyten name ende van vveghen de hooge Overheyt ende Graeflickheyt van Hollant, Zeelandt ende Vrieslant; verclaert de voorszeide informatien ende verificatien insuffisant, omme daer op eenige proceduren crimineel of civil tot laste vanden voorsz. Venator te institueren. Interdiceert eenen yegelicken den selven mette voorseide pointen ende articulen, of eenich inhouden van dien, directelick of indirectelick, te besvvaeren of te defameren, op pene van daer over gecorrigeert te vverden nae behooren. Aldus geresolveert inden hoogen Rade den 21 Iulij, ende ter Ordonnantie vanden selven Rade op den Stadthuyse ter vergaderinge vande Magistraet ende Vroedtschappen der voorszeide stede ghepronuncieert den 27 Iulij, Anno xvjC neghen. In kennisse van my E. Both van D. Eem.
Een wt de vroede roept.
Het is al peck int vier.
Tweede Commissaris.
Wy zij nochtans daerom niet comen hier,
Om meer twist te verwecken:
Maer om rechtveerdighe sententie t' ontdecken.
En om te stillen al die partien.
Eerste Commissaris.
Wel Greffier maeckt drie of vier copyen,
Oock voor claghers, enden beclaechden drae:
Op datse haer daer schicken nae.
Greffier.
| |
[Folio 52r]
| |
Sy zijn gheschreven al, Heeren nae u ghewaghen.
Eerste Commissaris.
Wel gheeftse den Stadtsbood te draghen,
En maeckt dat het gheschie subijt.
Geffier.
Bode ghy moet bestellen gaen met vlijt,
Dees briefkens die ick u hier gheef in corten tijt;
D' een suldy draghen tot Tectander Predikant:
Het ander gheeft Persijn, of Simple becant,
Het derde gheeft Heleen, oft in plaets haren Man.
En t' vierde suldy gaen bestellen dan,
Aen Warhiel een Leeraer der Kercken,
Verstaet mijn reden met op te mercken,
En doet stracks na mijn vermaen.
Stadtbode.
Wel aen ick sal terstont daer henen gaen // en doen u wil by tyde,
Daer sommighen om sullen droef zijn, en ander blyde.
|
|