Een claer ende doorluchtich vertooch van d'Alckmaersche kerckelicke gheschillen
(1611)–Adolphus Venator–
AuteursrechtvrijDe acht en tvvintichste verthooningh.Goewillert, Onpartydich hert en Tebbiaen.
Goewillert.
Och Onpartydich hert, my verlanght seeren,
Wanneer dat sullen comen de Heeren,
De Commissarissen al uyt den Haghe,
Dat eens macht eyndighen all' twist en claghe,
Door een rechtveerdighe sentency onverborghen.
Onpartydich hert.
Sy zijn ghecomen Broeder, van desen morghen,
| |
[Folio 50v]
| |
En brenghen de sententie nae rechten aert,
Soo dat de Vroetschap morghen sal zijn vergaert;
Om te worden verclaert het vonnisse voor haer.
Goewillert.
Wat segdy Onpartijdich hert? ist waer?
Hebdy s' Vonnis inhoudt oock niet vernomen?
Onpartydich hert.
Het is noch tot Tectanders voordeel ghecomen:
Want het recht heeft hem niet schuldich ghevonden,
Als ghy sult morghen breeder hooren verconden:
Ga naar margenoot+ Maer ick ben elders ghesonden, dus segh ick goeden dagh.
Tebbiaen comt uyt ende seyt.
Goewillert het is langh gheleen dat ick u sach:
Want niet alsoomen plach // wy comen t' samen.
Goewillert.
Dat doet cleyn liefde tot onser blamen:
Want sint die tijdt dat Vrede is verdreven,
Ende Nijdt in haer plaets wort verheven,
Is ons comen beneven // all ongheval.
Tebbiaen.
Daer af gheef ick de schult Tectander al,
In Gods Schaepstal, is hy als Wolf ghecropen;
Dan nu sal 't haest eyndighen, soo wy hopen,
Zijn valsche leer en overspel.
Goevvillert.
Jae Vrient, waer 't hem bewesen wel,
Tot dese sake waer dan goe raet.
Tebbiaen.
Het is ghenoech ghebleken metter daedt,
Dies hy niet langher voor en sal preken.
Goewillert.
Ick gheloof niet dat hy soo haest sal zijn versteken,
Mijn is terstondt ander tydingh ghebrocht:
Men sal als morghen ruycken ander locht,
En de waerheyt sal hem selven redden.
Tebbiaen.
Ick wilde wel nu teghen yemant wedden,
Dat hy niet sal preken noch vierthien daghen,
Ick set twee teghen een, com wildy 't waghen?
Goewillert.
Ick en hebbe behaghen // in 't wedden niet,
Den tijdt die sal 't ontdecken siet.
|
|