Een claer ende doorluchtich vertooch van d'Alckmaersche kerckelicke gheschillen

De seven en tvvintichste verthooningh.

Drie Diakens met haer mantels ende sacxkens, blootshooft, bereydt d' aelmis t' ontfanghen, comen al spreeckende uyt.

Eerste Diaken.

Jae 't Confraters, t' is tijdt om d' aelmis t' ontfanghen.

Tweede Diaken.

Ick hebber toe seer cleyn verlanghen,
Maer ick moet het nu doen uyt mijn Offitie.

Derde Diaken.

Ick segh u vanden selven: want vol malitie
Is den Tectander met alle zijn schaer.

Eerste Diaken.

Dat is noch al het minst ghevaer;
Mochtmen sonder beswaer zijn Officy volvoeren:
Maer elck een gaet spottelijck op ons loeren,
t' Zijn Burghers ofte Boeren // elck seydt het zijn.

Tweede Diaken.

Noch doet mijn hert al meerder pijn,
Dat den Tectander, als hy sal d' armen recommanderen,
Ons in ons presentie dan gaet blameren,
Voor alle die vergaringh met zijn schempighen praet:
Hy seyt, siet niet op die 't ontfanghen vroech of laet,
Oft sy d' aelmis t' ontfanghen wel zijn weerdich:

[fol. 50r]

 

Maer blijft in miltheyt altijdt volheerdich:

 

Want ghy ghevet niet haer, maer God ende den armen.

 

Derde Diaken.

 

Dat doet my dickwils suchten en karmen,

 

Als ick d' Aelmisse sal gaen ontfaen,

 

Dat hy ons daer soo langh tot spot van al laet staen:

 

Want hy ons dat doet uyt enckele spijt.

 

Eerste Diaken.

 

Dat doet hy om dat wy tot gheender tijt,

 

En willen hooren zijn Predicatie,

 

Onse sitplaets verlaten t' aller spatie,

 

En dat wy teghen hem ons stellen gaen partye,

 

Jae met ons sacxkens comen al uyt die sacrestye,

 

Wanneer wy onsen dienst sullen gaen doen:

 

Maer sal dit noch al langh dueren nae u vermoen?

 

Tweede Diaken.

 

Neen, het sal nu haest ghedaen wesen:

 

Want alsmen houdt het Synodus ghepresen,

 

Soo salmen hem doen inden Ban,

 

Soo crijght al t' Landt ten schrick daer van.

 

Derde Diaken.

 

Maer lieve Man, comt niet haest de sententie,

 

Over al zijn oneerlijcke inventie,

 

Die hy hier met de Vrouwen heeft bedreven?

 

Eerste Diaken.

 

Ick vrees t' sal ons gheen voordeel gheven:

 

Want het zijn Rechters van zijn naturen.

 

Tweede Diaken.

 

Hola, daer slaet de Clock thien uren.

 

Comt laet ons gaen.

 

Derde Diaken.

 

Wel aen.