Een claer ende doorluchtich vertooch van d'Alckmaersche kerckelicke gheschillen

De tvvee en tvvintichste verthooningh.

Onpartydich hert, ende een Bode in reys-cleederen.

Onpartydich hert.

Waer heenen vrient? het is teghen die nacht.

[fol. 44r]

 

Bode.

 

Ick moet gaen om een boodtschap van grooter macht:

 

Want onverwacht is de Vroetschap verdaecht,

 

Om morghen te vergaren: dies onversaecht,

 

Gaen ick als ghejaecht // om die zijn absent,

 

Op datse passen hier te wesen oock omtrent,

 

Op dat Tectander niet en word' verknesen:

 

Want d' ander souden anders de sterckste wesen,

 

Om hem van zijn Offitie te gaen stemmen:

 

Maer om haerluy boosheyt wat te temmen,

 

Soo moeten oock dees ander daer wesen by.

 

Onpartydich hert.

 

Dats goedt Vrient, ick denck vry,

 

Daer oock te comen al sonder schromen:

 

Want ick daer ben ontboden van som'ghe vromen,

 

Die Vrede lieven en vluchten Nijdt.

 

Bode.

 

Wel Onpartydich hert, ick moet gaen, het is tijdt:

 

Want ick sonder respijt // moet al de nacht lanck ryden,

 

Op datse morghen zijn alhier by tyden.

 

Onpartydich hert.

 

God maeck u reys voorspoedich ende cort. ⁺

+ Sy gaen in.