Een claer ende doorluchtich vertooch van d'Alckmaersche kerckelicke gheschillen
(1611)–Adolphus Venator–
AuteursrechtvrijDe tvvintichste verthooningh.Helena met haer Mans Broer comen t' samen uyt al sprekende, daer na comt Simple, Tectander, en Onpartydich hert.
Helena.
Maer Broer, wanneer sou dat moeten gheschieden?
Mans Broer.
Nu terstont: want sy u ontbieden,
Op dat ghy voor haerlieden // sult doen uwe beclach.
Helena.
Maer waerom juyst van desen dach?
Mans broer.
Om dat het Classis nu is vergaert,
Soo willen sy nu dattet worde verclaert
Voor alle des Classis Lidtmaten.
Helena.
Ick weet niet wat doen ofte laten:
Want ick mee ben al wat beschroomt:
Maer liever Broer doch met my coomt,
Op dat ick my wat mach verstouten:
Ick wou dat icker noyt af had gaen couten,
Om datter nu af comt alsulcken gherucht.
Mans broer.
Ick sal wel met u gaen, weest niet beducht:
Want het is tot voordeel van Godes Kercke,
En ghy sult wellecoom zijn inder Classis percke,
Ende men sal daer u reden niet versmaen.
| |
[Folio 40v]
| |
Helena.
Wel ick mach na u woort daer henen gaen,
En die Broers doen verstaen, mijn clachten overvloedich.
Mans broer.
Ga naar margenoot+ Wel gaen wy Suster, maer spreeckt cloeckmoedich.
Simple comt uyt.
Och dit en had ick noyt ghedacht,
Dat hy my noch hier toe soude hebben ghebracht,
Dat ick Tectander soude beclaghen,
Van t' ghene dat hy noyt en gingh ghewaghen;
Wat heb ick een knaghen // in mijn ghemoet.
Hoe noot doen ick dese daet onvroet;
Nochtans om mynen man wel te ghevallen,
Moet ick teghen mijn hert, als nu gaen callen,
O bittere Gallen // O snoode mont:
Dat ghy teghen u hert soo spreken cont:
Nochtans moet het terstont al zijn volbracht,
Of ick en hebbe rust dagh nochte nacht.
Tectander.
Maer wat mach dit als nu bedieden,
Datse my voor t' Classem weder ontbieden?
Oft sylieden hebben berou van haer sententie?
Oft sy ghesint zijn te doen penitentie?
Van haren quaet voornemen onghegrondt?
Oft hebben sy vonden eenen nieuwen vondt?
Om my te doen d' een leet op d' ander.
Onpartydich hert comt en roept.
Hem, hem, waer wildy gaen Tectander?
Seght my Vrient, hoe sydy te passe.
Tectander.
Ick moet gaen al na de Classe:
Want s' hebben my rasse // derwaerts ontboden,
En daerom te gaen is my van noden,
Belieft u wat te wachten hier?
Ick sal wel haestelijck weercomen schier,
Ga naar margenoot+ En u mijn sake alsdan vertellen.
Onpartydich hert al wandelende.
Wat zijn hier int Classi snode ghesellen?
Die Godes Kercke quellen // in alderley manieren,
Ten zijn maer Wolven, oft felle gieren,
Die de gheheele Stadt stellen in roeren.
Sy maken partydich, Burghers en Boeren,
Door twistich oproeren // vol nydich bedrijf,
En waerom is anders al haer ghekijf,
| |
[Folio 41r]
| |
Dan om haer eere en macht niet te verliesen,
Daerom gaen sy den twist voor vrede kiesen,
Om dat sommighe mercken haer valsche waen,
Diese mee Blinden yver houden staen,
Zijnde becleedt met Heylighen schijn;
Dit doet de vrome herten veel pijn,
Die voor haer vluchten ende verflouwen:
Want die vreedsame voeten zijn nu Wolfs clouwen,
En dit is twists oorsaeck op ende neder.
Tectander comt weder uyt, ende seydt.
Dat is ghedaen, hier ben ick weder,
Met cleyne vreucht in mijnder hert.
Onpartydich hert.
Isser nu weder een nieuwe part?
Ey liever oft ghy 't my verclaerde.
Tectander.
Jae 't, ick vant twee Vrouwen die my beswaerde,
Als dat ick haer oneer had voorgheleyt:
Maer ick was haer t' antwoorden niet bereyt,
Voor sulcke Rechters die my benyen:
Want ick scholts' alle voor mijn partyen.
Onpartydich hert.
Maer wildense wel lyen // alsulcke reden?
Tectander.
Neense: sy waren al heel t' onvreden.
Ick seyd' met goede seden // beclaghet my eenpaer,
Voor onpartydighe Rechters in 't claer,
Daer sal voor ende naer mijn antwoort blijcken,
Ende daer mede wilde ick gaen strijcken:
Maer siet my worde noch voorghewent,
Om dat van my gheen schult was bekent:
Maer noch ghestadich volharden in het preecken,
En dat ick haer vonnis gingh versteecken,
Haer niet kennende voor mijn Rechters weert;
Dat sy my noch hielden ghesuspendeert,
Van mijn Officy by provisi gheset,
Dan wat hier toe sal segghen voort de Wet,
Dat salmen noch wel bet // seer haest vernemen.
Onpartydich hert.
Sy volghen noch al haer oude themen,
En soecken daghelijcks meer nieuwe stucken,
Op datse u t' hooft mochten onderdrucken;
Daerom sy gaen oprucken // dees Vrouwen stout:
Want uyt haer selven, t' is sonder fout,
| |
[Folio 41v]
| |
Souden sy sulcks gheensins beginnen.
T' is haer van de Mannen ghegheven inne,
En hare Mans die zijn hier toe bepraet
Vanden partydighen Kerckenraet:
Maer God die niet den vromen en verlaet,
Die sal haer allen nochtans beschamen.
Onpartydich hert.
Dat hoop ick Tectander, God hoed' u voor blamen.
Tectander.Ga naar margenoot+
Amen.
|